تۋىستار مەن دوستار اۋدارعان اقشاعا سالىق سالىنا ما
استانا. KAZINFORM — قازاقستاندا تۋىستار مەن دوستاردان نەمەسە سىيلىق رەتىندە الىنعان اقشاعا سالىق سالىنبايدى. قانداي جاعدايدا اقشا اۋدارىمدارىنا سالىق سالىنبايتىنىن ق ر قارجى مينيسترلىگى مەملەكەتتىك كىرىستەر كوميتەتىنىڭ جەكە تۇلعالاردىڭ كىرىستەرىن اكىمشىلەندىرۋ باسقارماسىنىڭ ساراپشىسى داناگۇل ساعىنبەك ءتۇسىندىردى.
ماماننىڭ ايتۋىنشا، ەڭ الدىمەن اقشانىڭ قانداي ماقساتتا اۋدارىلعانى ەسكەرىلەدى. ەگەر قاراجات جەكە قاجەتتىلىك ءۇشىن بەرىلسە، ول سالىق سالىناتىن تابىس رەتىندە ەسەپتەلمەيدى.
— تۋىستار اراسىندا جەكە ماقساتتا جاسالعان اقشا اۋدارىمدارىنا سالىق سالىنبايدى. ءدال وسىنداي ءتارتىپ دوستاردان نەمەسە سىيلىق رەتىندە الىنعان قاراجاتقا دا قولدانىلادى. وسىلايشا، اقشا جەكە قاجەتتىلىك ءۇشىن اۋدارىلسا، ودان جەكە تابىس سالىعىن تولەۋ تالاپ ەتىلمەيدى، — دەدى داناگۇل ساعىنبەك.
ساراپشى موبيلدى اۋدارىمدارعا قاتىستى حابارلاما العان ازاماتتاردىڭ سالىق ورگاندارىنا بارۋى قاجەت پە دەگەن سۇراققا دا جاۋاپ بەردى.
— اقپاراتتىق push-حابارلاماعا جاۋاپ بەرۋدىڭ نەمەسە سالىق ورگانىنا ارنايى بارۋدىڭ قاجەتى جوق. ال كامەرالدىق باقىلاۋ ناتيجەسىندە حابارلاما كەلسە، ازامات سالىق ەسەپتىلىگىن تاپسىرۋى ءتيىس. ەگەر انىقتالعان سايكەسسىزدىكتەرمەن كەلىسپەسە، تۇسىنىكتەمە بەرە الادى. مۇنىڭ بارلىعىن سالىق تولەۋشىنىڭ جەكە كابينەتى ارقىلى جاساۋعا بولادى، — دەپ قوستى ول.
ەسكە سالايىق، 8 -قاراشادان باستاپ قازاقستاندا موبيلدى اۋدارىمداردى باقىلاۋ تالاپتارى وزگەردى.
