پۋتين ەردوعانمەن شىلدە ايىندا استانادا كەزدەسۋدى جوسپارلاپ وتىر

استانا. KAZINFORM - رەسەي پرەزيدەنتى ۆلاديمير پۋتين تۇركيا پرەزدەنتى رەجەپ تايپ ەردوعانمەن شىلدە ايىندا استانادا وتەتىن سامميتتە كەزدەسۋدى جوسپارلاپ وتىر، دەپ حابارلايدى رەسەيلىك ت ا س س.

Путин и Эрдоган
Фото: Алексей Дружинин/ пресс-служба президента РФ/ ТАСС

«پرەزيدەنت ەردوعانعا مەنىڭ ەڭ ىزگى تىلەكتەرىمدى جەتكىزۋىڭىزدى سۇرايمىن. مەنىڭشە، ول شىلدەنىڭ 3-4 ارالىعىندا وتەتىن حالىقارالىق ءىس-شارا اياسىندا استانادا بولۋى كەرەك. مىنە، سول ۋاقىتتا كەزدەسىپ، قاجەتتى ماسەلەلەلەردى تالقىلايتىن ۋاقىت تابامىز دەگەن ۇمىتتەمىن»، - دەدى رەسەي باسشىسى تۇركيا سىرتقى ىستەر مينيسترلىگىنىڭ باسشىسى حاكان فيدانمەن كەزدەسۋى بارىسىندا.

3-4 -شىلدە ارالىعىندا استانادا شانحاي ىنتىماقتاستىق ۇيىمىنىڭ سامميتى وتەدى.

ءوز كەزەگىندە تۇركيا سىرتقى ىستەر ءمينيسترى پۋتيننىڭ رەسەي مەن تۇركيانىڭ ءتۇرلى باعىتتار بويىنشا ىنتىماقتاستىعى جونىندەگى ايتقان ماسەلەلەرىنە نازار اۋداردى. ول انكارانىڭ ءتۇرلى ايماقتاردا بولىپ جاتقان جانجالداردى رەتتەۋگە بارىن سالىپ جاتقانىن اتاپ ءوتتى.

پۋتين تۇركيامەن اراداعى قارىم-قاتىناسقا قاناعاتتاناتىندىعىن جەتكىزدى.

«وسىنىڭ بارلىعى دا ءبىزدىڭ دوسىمىز تۇركيا پرەزيدەنتىنىڭ جەتەكشىلىگى مەن قولداۋىنىڭ ارقاسىندا جۇزەگە اسىپ جاتىر»، - دەدى ول.

رەسەي پرەزيدەنتى 2023 -جىلى ءوسىم جاقسى بولعانىمەن، 2024 -جىلى تاۋار اينالىمى ءبىرشاما تومەندەگەندىگىن اتاپ ءوتتى.

«دەگەنمەن ءبىز بۇنى ەڭ الدىمەن ءبىزدىڭ ەكسپورت پەن يمپورت بويىنشا نەگىزگى تاۋارلارىمىزعا تۇزەتۋلەر ەنگىزىلۋىمەن بايلانىستىرامىز. مەن، الداعى ۋاقىتتا جاعدايدى رەتتەيتىن مۇمكىندىك تۋادى جانە وتكەن جىلعىداي دامۋ بولادى دەگەن ۇمىتتەمىن. وتكەن جىلى ءبىزدىڭ ەلدەرىمىزدىڭ اراسىنداعى تاۋار اينالىمى ابسوليۋتتى رەكورد ورناتتى»، - دەدى پرەزيدەنتى.

ارنايى Kazinform ءۇشىن سەرىكتەس ت ا س س اگەنتتىگىنەن ۇسىنىلدى.

اۆتور

ايدار وسپاناليەۆ

سوڭعى جاڭالىقتار