تىكۇشاق اپاتى: قورعانىس مينيسترلىگى اپاتتىڭ ءارتۇرلى نۇسقاسىن قاراستىرىپ جاتىر

استانا. KAZINFORM - قورعانىس مينيسترلىگى بىرەر كۇن بۇرىن اقتوبە وبلىسىندا مي-8 تىكۇشاعىنىڭ اپاتقا ۇشىراۋ سەبەبىنىڭ بىرنەشە نۇسقاسىن بولجاپ وتىر.

بۇل تۋرالى قورعانىس ءمينيسترىنىڭ ءبىرىنشى ورىنباسارى - قازاقستان رەسپۋبليكاسى قارۋلى كۇشتەرى باس شتابىنىڭ باستىعى سۇلتان قامالەتدينوۆ ءمالىم ەتتى.

«وكىنىشكە قاراي، مۇنداي فاكتىلەر بولىپ تۇرادى. قازىر تەرگەۋ شارالارى ءجۇرىپ جاتىر. كوميسسيا جۇمىسىنان كەيىن ناتيجەسى بەلگىلى بولادى. الدىن الا مالىمەتتەر بويىنشا، ءارتۇرلى نۇسقالار، سونىڭ ىشىندە تەحنيكانىڭ ىستەن شىعۋى قاراستىرىلىپ جاتىر. جالپى العاندا، كەز- كەلگەن تەحنيكانىڭ ىستەن شىعۋ قاۋپى بار. اتالعان تىكۇشاق ەڭ سەنىمدى بولىپ سانالادى جانە الەمنىڭ 50-دەن استام ەلىندە قولدانىلادى»، - دەدى سۇلتان قامالەتدينوۆ ەلوردادا وتكەن Digital army day ءىس-شاراسى بارىسىندا.

ەسكە سالا كەتسەك، 9- قاراشادا اقتوبە وبلىسى مارتوك اۋدانيا سارى ارقا اۋىلى ماڭىندا اسكەري تىكۇشاق جانىپ، بورتتا بولعان ءبىر ادام مەرت بولعان ەدى. ەكەۋى اۋرۋحاناعا جەتكىزىلدى.

اقتوبە وبلىسىنىڭ اكىمدىگى تىكۇشاق اپاتىنان زارداپ شەككەندەرگە كومەك كورسەتىلەتىنى تۋرالى حابارلادى.

ءىزىن سۋىتپاي اقتوبەدە تىكۇشاق اپاتىنا بايلانىستى قىلمىستىق ءىس قوزعالدى.

اۆتور

داۋلەت ىزتىلەۋ