تيبەتتە شىرقالعان «فاريدا» ءانى 10 ميلليون قارالىم جينادى - ەكسكليۋزيۆتى سۇحبات

استانا. KAZINFORM - وتكەن اپتادا قىتايدىڭ Tiktok جەلىسىندە «فاريدا» ءانى كوپ قارالىم جيناپ، تانىلا باستادى. تيبەت حالقىنىڭ ۇلتتىق كيىمىن كيىپ، قازاقشا ءان شىرقاعان جاس بلوگەر دوڭ دجۋ KAZINFORM اگەنتتىگىنە سۇحبات بەردى.

اگەنتتىك انىقتاعانداي، 23 جاستاعى دوڭ دجۋ قىتايدىڭ تيبەت اۆتونومدى اۋدانىنا شەكارالاس سىچۋان پروۆينتسياسىندا تۇرادى. ءوز ايماعىندا بلوگەرلىكپەن اينالىسادى. سونداعى قازاق دوستارىنان ەستىگەن ىرعاقتى ءاندى اعاسىنىڭ ۇيلەنۋ تويىندا ايتىپ شىققان.

«قازاقستانعا بارىپ كورمەدىم. قىتايدا كوپتەگەن قازاق حالقى تۇراتىنىن، تىلدەرىڭىز ۇيعىر تىلىمەن ۇقساس ەكەنىن بىلەمىن. بالا كەزىمنەن حوببي رەتىندە ءان سالامىن. دۇنگەن، قىتاي، قازاق، ۇيعىر اندەرىن ايتامىن، اسىرەسە كوڭىلدى، ىرعاقتى اندەردى جاقسى كورەمىن»، - دەيدى دوڭ دجۋ.

العاش رەت «فاريدا» ءانىن 2003-جىلى «مۋزارت» توبى ورىنداعان ەدى. الايدا قىتايلىق بلوگەر بۇل ءاننىڭ عازيزحان شەكەربەكوۆ جاساعان جاڭا مۋزىكالىق ارانجيروۆكاسىن پايدالانعان.

«بۇل بەينەروليك قىتايدىڭ الەۋمەتتىك جەلىلەرىندە 10 ميلليوننان استام قارالىم جينادى. ونىڭ ىشىندە شىڭجاڭ-ۇيعىر اۆتونومدى اۋدانىندا ەڭ كوپ كورىلگەن جانە ىلە قازاق اۆتونوميالىق وبلىسىنداعى ىلە قالاسىنىڭ راديوارناسىندا قويىلىپتى. قىتايدىڭ Tiktok-تان باسقا الەۋمەتتىك جەلىلەرىنە دە تارادى. ماعان سوڭعى ءۇش كۇندە 20 مىڭ جاڭا كورەرمەن قوسىلدى»، - دەيدى بلوگەر.

سونىمەن بىرگە دوڭ دجۋ بەينەروليكتە كورسەتىلگەن تيبەت حالقىنىڭ «حاداك» ءداستۇرى تۋرالى ايتىپ بەردى. حاداك- تيبەت حالىقىنىڭ ءتۇرلى توي- جيىنىندا قۇرمەتتى ادامعا سىيلاناتىن ءتۇرلى- ءتۇستى جىبەك ماتالارى. ونىڭ ءاربىر ءتۇسى ماحابباتتى، تۇراقتىلىقتى، اقىل، مەيىرىم، تازالىقتى بىلدىرەدى.

اۆتور

ايجان سەرىكجان قىزى