توقايەۆ وندىرىستە ج ي قولدانۋدىڭ ءبىرىڭعاي مەحانيزمىن قۇرۋدى تاپسىردى
استانا. KAZINFORM - پرەزيدەنت جاساندى ينتەللەكتىنى دامىتۋ جونىندەگى كەڭەستىڭ ءۇشىنشى وتىرىسىندا وندىرىستەگى ج ي جوبالارىن دامىتۋعا ارتىق كەدەرگىلەر بولماۋى كەرەك ەكەنىن باسا ايتتى، دەپ حابارلايدى اقوردانىڭ باسپا ءسوز قىزمەتى.
قاسىم-جومارت توقايەۆ وندىرىستىك Deep-Tech جوبالاردى ىلگەرىلەتۋ جانە مىقتى تەحنولوگيالىق كوماندالار جاساقتاۋ وتە ماڭىزدى دەپ سانايدى. ونىڭ ايتۋىنشا، يندۋستريالىق مىندەتتەردى ورىندايتىن مۇنداي كوماندا قۇرامىنا عىلىمي قاۋىمداستىق، تەحنولوگيالىق كومپانيالار مەن ستارتاپتار ەكوجۇيەسىنىڭ وكىلدەرى ەنۋى قاجەت.
- سونىمەن قاتار AI Challenge مەحانيزمىن قولدانعان ءجون. بۇل ىسكە «سيفرلىق كوشپەلىلەر» مەن تالانتتى جاستاردى تارتۋعا بولادى. فورمات ءار تاپسىرمانىڭ ەرەكشەلىگىنە قاراي بەيىمدەلۋگە ءتيىس. ياعني كوماندانى اشىق ىرىكتەۋ مەن مىندەتتەردى ايقىنداۋدان باستاپ، ىزدەنىس ناتيجەلەرىن شىنايى وندىرىستە سىناۋعا دەيىن يكەمدى بولعانى ءجون. دەرەكتەر، ەسەپتەۋ رەسۋرستارى جانە ءوندىرىس ينفراقۇرىلىمى كوماندالارعا قولجەتىمدى بولۋعا ءتيىس. بۇل رەتتە تاپسىرىس بەرۋشى تىسقارى قالماي، ۇدەرىستىڭ ءار كەزەڭىنە قاتىسۋى قاجەت. ايتسە دە ج ي جانە DeepTech ساناتىنداعى ونەركاسىپ جوبالارىنا، اسىرەسە، تەحنولوگيالىق تاۋەكەلدەرى كوپ، كوممەرتسيالىق تيىمدىلىگى دالەلدەنبەگەن باستاپقى كەزەڭدە ۋاقىت پەن رەسۋرس كەرەك ەكەنىن مويىنداعان ءجون. ۇكىمەت باستاپقى تاۋەكەلدەردى ازايتۋعا كومەكتەسىپ، جەكە كاپيتالدى تارتۋعا جاعداي جاساۋى كەرەك. كەيىنىرەك پەرسپەكتيۆتى جوبالار، نەگىزىنەن، نارىقتىق ورتادا دامۋعا ءتيىس، - دەدى مەملەكەت باسشىسى.
پرەزيدەنتتىڭ پىكىرىنشە، AI- Sana باعدارلاماسى وندىرىستەگى ناقتى مىندەتتەرمەن تىعىز بايلانىستى بولعانى ءجون. دارىندى جاستار ەكونوميكانى جاڭعىرتۋ ىسىندە تاجىريبە جيناقتاۋى كەرەك.
ۇكىمەتكە جاساندى ينتەللەكتىنى ونەركاسىپتە پايدالانۋ مىندەتتەرىن شەشۋدىڭ ءبىرىڭعاي مەحانيزمىن قۇرۋ جونىندە تاپسىرما بەرىلدى. ونىڭ اياسىندا لايىقتى كوماندانى تاڭداۋدان باستاپ، ناتيجەنى سىناقتان وتكىزۋ جانە ەكونوميكالىق تيىمدىلىگىن باعالاۋ كەزەڭدەرى تۇگەل قامتىلۋعا ءتيىس.
قاسىم-جومارت توقايەۆ تەكسەرىلگەن شەشىمدەردى جاپپاي تاراتۋدىڭ انىق ءارى وڭتايلى تەتىكتەرىن قۇرۋ قاجەتتىگىنە نازار اۋداردى.
- كوپتەگەن پەرسپەكتيۆتى شەشىمدەر پيلوتتىق جوبا ساتىسىنان ءساتتى وتكەنىمەن، قوسىمشا كەلىسۋلەر، قايتالاما سىناقتار، كۇردەلى ساتىپ الۋ ۇدەرىستەرى مەن زاڭنامالىق شەكتەۋلەر سالدارىنان اياقسىز قالادى. بۇل كاسىپورىنداردىڭ پايدا تابۋىنا جانە ازىرلەۋشىلەردىڭ نارىقتىق مۇمكىندىكتەرىنە كەدەرگى كەلتىرەدى. ءتيىمدى تاسىلدەردى كوممەرتسيالاندىرۋدىڭ ايقىن تەتىگى بولۋى كەرەك. ونى وندىرىستىك جاعدايى ۇقساس كاسىپورىنداردا قايتا سىناقتان وتكىزۋدىڭ قاجەتى جوق. ۇتىمدى وتاندىق شەشىمدەرگە دە باسا نازار اۋدارعان دۇرىس. ۇكىمەتكە تابىستى پيلوتتىق جوبالاردى تەز ارادا كوممەرتسيالاندىرۋ جانە كەڭىنەن تاراتۋ جولدارىن قاراستىرۋدى ۇسىنامىن. ەكونوميكالىق تۇرعىدان پايدالى شەشىمدەردى ىسكە اسىرۋدا ارتىق كەدەرگىلەردەن ارىلعان ابزال، - دەدى مەملەكەت باسشىسى.
بۇعان دەيىن حابارلانعانداي، مەملەكەت باسشىسى جاساندى ينتەللەكتىنى دامىتۋ جونىندەگى كەڭەستىڭ ءۇشىنشى وتىرىسىن وتكىزدى.
