توقايەۆ: وتكەن جىلى قازاقستاندىق IT- قىزمەتتەر ەكسپورتى 1 ميلليارد دوللاردان استى
استانا. KAZINFORM - مەملەكەت باسشىسى جاساندى ينتەللەكتىگە قاتىستى اسقان جاۋاپكەرشىلىك تانىتۋ قاجەت ەكەنىن اتاپ ءوتتى، دەپ حابارلايدى اقوردا.
- جاقىندا پرەزيدەنت دونالد ترامپتىڭ باستاماسىمەن امەريكانىڭ جەتەكشى تەحنولوگيالىق كومپانيالارى سۋپەرينتەللەكت تۋرالى كەلىسىمگە قول قويعانىن ايتقىم كەلەدى. مەنىڭ ويىمشا، مۇددەلى ەلدەر وسى ءتاسىلدى ۇلگى رەتىندە قاراستىرىپ، مۇقيات زەردەلەگەن سوڭ جاھاندىق دەڭگەيدە قولدانۋعا بولار ەدى، - دەدى قاسىم-جومارت توقايەۆ.
پرەزيدەنت قازاقستاندى تسيفرلىق مەملەكەتكە اينالدىرۋ ءۇشىن جۇيەلى شارالار قابىلدانىپ جاتقانىنا نازار اۋدارىپ، ەلىمىزدىڭ جەتىستىكتەرىنە توقتالدى.
- وتكەن جىلى قازاقستاندىق IT- قىزمەتتەر ەكسپورتى 1 ميلليارد دوللاردان استى. سيفرلىق شەشىمدەرىمىز الەمنىڭ 100 دەن اسا ەلىندە قولجەتىمدى. بۇل قادامدار مەن جەتىستىكتەر ەلىمىزدەگى جانە الەمدەگى پروگرەسكە ۇلەس قوسۋعا قازاقستاننىڭ دا نيەتتى ەكەنىن كورسەتەدى. دەگەنمەن وزىق تەحنولوگيا سالاسىنداعى بۇل جەتىستىكتەرمەن شەكتەلىپ قالۋعا بولمايدى. ءبىز ەلىمىزدىڭ مىقتى تەحنولوگيالىق نەگىزىن قالىپتاستىرامىز دەسەك، يننوۆاتسيالىق ستارتاپ- كومپانيالارعا ناقتى قولداۋ كورسەتىپ، وزىق جوبالاردى جۇزەگە اسىرۋىمىز كەرەك، - دەدى مەملەكەت باسشىسى.
بۇل رەتتە پرەزيدەنت ونەركاسىپ سالاسى بويىنشا جاساندى ينتەللەكت مىندەتتەرىنىڭ ءتىزىمىن جاساۋ ماڭىزدى دەپ سانايدى. اتالعان ءتىزىم ناقتى ەكونوميكالىق قاجەتتىلىكتەرگە نەگىزدەلۋگە ءتيىس.
سونداي-اق قاسىم-جومارت توقايەۆ وسى تىزىمگە سۇيەنە وتىرىپ، قازاقستان مەن شەتەلدەن كەلگەن كوماندالاردىڭ قاتىسۋىمەن AI Challenge ۇيىمداستىرۋدى ۇسىندى. وڭ ناتيجە كورسەتكەن ۇزدىك جوبالار مىندەتتى تۇردە وندىرىسكە ەنگىزىلەدى.
