توقايەۆ وڭاي ولجا تابۋ تۋرالى جارنامالارعا سەنبەۋگە شاقىردى

استانا. KAZINFORM - ادەمى ءومىر ءسۇرۋ مەن وڭاي ولجا تابۋ تۋرالى جارنامالار حالىقتىڭ ساناسىنا بارلىق جەتىستىككە قينالماي قول جەتكىزۋگە بولادى دەگەن بوس قيالدى سىڭىرەدى. 

بۇل تۋرالى اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا مەملەكەت باسشىسى قاسىم-جومارت توقايەۆ ايتتى.

«ەڭبەكقورلىق پەن جاۋاپكەرشىلىك ۇلتىمىزدىڭ بىرەگەي بولمىسىنا اينالۋعا ءتيىس. بۇگىندە الەۋمەتتىك جەلىلەردە ادەمى ءومىر ءسۇرۋ مەن وڭاي ولجا تابۋ تۋرالى جارنامالار كوبەيىپ كەتتى. بۇل حالىقتىڭ ساناسىنا بارلىق جەتىستىككە قينالماي قول جەتكىزۋگە بولادى دەگەن بوس قيالدى سىڭىرەدى. جاستاردىڭ بەلگىلى ءبىر بولىگى سوعان سەنىپ، التىن ۋاقىتتارىن بوسقا سارپ ەتۋدە. كەز كەلگەن جەتىستىككە تىنىمسىز ەڭبەك قانا جەتكىزەتىنى داۋسىز. بۇرىنعىلار «ەڭبەك ءبارىن جەڭبەك» دەپ بەكەر ايتپاعان»، - دەدى قاسىم-جومار توقايەۆ.

پرەزيدەنت ەلىمىزدەگى ءار ازاماتتىڭ ادال ءارى جاۋاپتى ەڭبەك ارقىلى تابىسقا جەتكەنىن قالايتىندىعىن باسا ايتتى.

«بۇل - ازاماتتارىمىزدىڭ ومىرلىك ماقساتىنا اينالۋعا ءتيىس. «ادال ادام - ادال ەڭبەك - ادال تابىس» قاعيداسىنىڭ ءمانى دە وسىندا جاتىر. مەن جاستارعا سەنەتىنىمدى ۇنەمى ايتىپ كەلەمىن. اۋىل شارۋاشىلىعى جاستاردىڭ ءوزىن تانىتۋىنا مول مۇمكىندىك بەرەدى دەپ ويلايمىن. اۋىلعا مامان تارتۋدىڭ قانشالىقتى قيىن ەكەنىن جاقسى بىلەتىن شارۋاشىلىق باسشىلارى بۇل ىسكە ەرەكشە مۇددەلى»، - دەدى مەملەكەت باسشىسى.

اۆتور

ەسىمجان ناقتىباي