توقايەۆ ەمومالي راحمونمەن سويلەسىپ، قازاق-تاجىك بايلانىسىن كەڭەيتۋدىڭ ماڭىزىن ايتتى
استانا. KAZINFORM - مەملەكەت باسشىسى تاجىكستان پرەزيدەنتىن تۋعان كۇنىمەن قۇتتىقتاپ، باۋىرلاس تاجىك حالقىنىڭ يگىلىگى جولىنداعى جاۋاپتى مەملەكەتتىك قىزمەتىنە تابىس تىلەدى. بۇل تۋرالى اقوردا ءمالىم ەتتى.
- قاسىم-جومارت توقايەۆ ەمومالي راحموننىڭ تاۋەلسىز تاجىكستان مەملەكەتىنىڭ قالىپتاسۋىنا، بەيبىتشىلىك پەن كەلىسىمدى ورنىقتىرۋعا، ەلدىڭ ۇزاقمەرزىمدى دامۋىنا قوسقان تاريحي ۇلەسىن اتاپ ءوتتى. قازاقستان پرەزيدەنتى تاجىكستان كوشباسشىسىنىڭ ەكى مەملەكەت اراسىنداعى عاسىرلاردان تامىر تارتاتىن دوستىق پەن ءوزارا قولداۋعا نەگىزدەلگەن ستراتەگيالىق سەرىكتەستىكتى جانە وداقتاستىقتى نىعايتۋداعى رولىنە جوعارى باعا بەردى. اڭگىمەلەسۋ بارىسىندا قاسىم-جومارت توقايەۆ پەن ەمومالي راحمون ەكىجاقتى ىنتىماقتاستىقتىڭ دامۋ قارقىنىنا كوڭىل تولاتىنىن جەتكىزدى. سونداي-اق مەملەكەتارالىق ىقپالداستىقتىڭ بارلىق باعىتى بويىنشا قازاق-تاجىك بايلانىسىن كەڭەيتۋدىڭ ماڭىزىنا توقتالدى، - دەلىنگەن حابارلامادا.
مەملەكەتتەر باسشىلارى حالىقارالىق جانە وڭىرلىك كۇن تارتىبىندەگى وزەكتى ماسەلەلەر بويىنشا پىكىر الماسىپ، الداعى كەزدەسۋلەر كەستەسىن تالقىلادى.
ايتا كەتەيىك، بۇعان دەيىن مەملەكەت باسشىسى مۇعالىمدەردى كاسىبي مەرەكەسىمەن قۇتتىقتادى.
