توقايەۆ ت م د-نىڭ ىقپالىن كۇشەيتەتىن جاڭا قادامدى ۇسىندى
استانا. KAZINFORM - پرەزيدەنت دوستاستىقتىڭ حالىقارالىق بايلانىسىن كەڭەيتۋ قاجەت دەپ سانايدى. بۇل تۋرالى ول ت م د مەملەكەتتەرى باسشىلارى كەڭەسىنىڭ وتىرىسىندا ايتتى، دەپ اقوردا ءمالىم ەتتى.
اتاپ ايتقاندا، قاسىم-جومارت توقايەۆ ەلىمىزدىڭ ۇسىنىسىمەن ت م د جانىنان بايقاۋشىلار جانە سەرىكتەستەر ينستيتۋتى قۇرىلعانىن ەسكە سالدى.
- وسى باستامانىڭ جەلىسىمەن «ت م د پليۋس» فورماتى پايدا بولدى. ەندىگى قادام - العاشقى «ت م د پليۋس» سامميتىن ۇيىمداستىرۋ دەپ ويلايمىن. جوعارى دەڭگەيدەگى مۇنداي كەزدەسۋ ىقپالداستىق گەوگرافياسىن كەڭەيتىپ، ەۋرازيالىق اۋقىمداعى اشىق ءارى سۇرانىسقا يە الاڭ رەتىندە ۇيىمنىڭ ءرولىن كۇشەيتەدى. قازاقستان كونسترۋكتيۆتى ۇستانىمعا ساي ەۋرازياداعى قاۋىپسىزدىك جانە ىنتىماقتاستىق تۇجىرىمداماسىن جەتىلدىرۋ بويىنشا ورتاق جۇمىسقا اتسالىسۋعا نيەتتى. اتالعان قۇجاتتىڭ سيپاتى جاعىمدى، كونفرونتاتسيالىق مازمۇننان ادا بولعانى ءجون، - دەدى پرەزيدەنت.
مەملەكەت باسشىسى ءسوز سوڭىندا 35 جىل ىشىندە دوستاستىق ۇيىمى مەملەكەتتەر مەن حالىقتار ءومىرىنىڭ اجىراماس بولىگىنە اينالعانىن اتاپ ءوتتى. سونداي-اق كەلەسى جىلى ت م د-عا ءتوراعالىق ەتەتىن وزبەكستانعا ساتتىلىك تىلەدى.
