توقايەۆ گەرمانيا پرەزيدەنتىن «التىن قىران» وردەنىمەن ماراپاتتادى

ماراپاتتاۋ سالتاناتىندا مەملەكەت باسشىسى پرەزيدەنت فرانك-ۆالتەر شتاينمايەردىڭ قازاقستان مەن گەرمانيا اراسىنداعى ىنتىماقتاستىقتى نىعايتۋعا سۇبەلى ۇلەس قوسقانىن اتاپ ءوتتى.

- ءسىزدىڭ پاراساتتى باسشىلىعىڭىز، بەرىك ۇستانىمىڭىز جانە ديالوگ پەن بىرلىككە بەيىلدىگىڭىز زور قۇرمەتكە لايىق. بۇل گەرمانياعا الەمدەگى سەرىكتەستەرىنىڭ سەنىمىن كۇشەيتىپ، ىقپالداستىققا جول اشتى. بۇگىندە گەرمانيا - وندىرىستە، عىلىم مەن تەحنولوگيادا كوش باستاعان، دامۋى قارقىندى يننوۆاتسيالىق ەلدەردىڭ ءبىرى، - دەدى پرەزيدەنت.

قاسىم-جومارت توقايەۆ ەكىجاقتى قارىم-قاتىناستى ىلگەرىلەتۋدەگى فرانك-ۆالتەر شتاينمايەردىڭ رولىنە توقتالدى.

- پرەزيدەنت مىرزا، ءسىزدى قازاقستاننىڭ ادال ءارى سەنىمدى دوسى، حالىقارالىق دەڭگەيدەگى كورنەكتى مەملەكەت قايراتكەرى رەتىندە جوعارى باعالايمىز. قازاقستان مەن گەرمانيا اراسىنداعى دوستىقتى نىعايتۋعا، ىنتىماقتاستىعىمىزدى جانداندىرۋعا قوسقان قوماقتى ۇلەسىڭىزدى ەسكەرە وتىرىپ، سىزگە قازاقستان رەسپۋبليكاسىنىڭ ەڭ جوعارى مەملەكەتتىك ناگراداسى - «التىن قىران» وردەنىن تابىستايمىن. بۇل ماراپاتتى قازاق حالقىنىڭ ايرىقشا قۇرمەتى مەن شىنايى ريزاشىلىعىنىڭ بەلگىسى رەتىندە قابىل الىڭىز، - دەدى مەملەكەت باسشىسى.

فرانك-ۆالتەر شتاينمايەر ورتالىق ازياعا ۇدايى نازار اۋداراتىنىن ايتتى

- مەن ءۇشىن قازاقستان حالقىنىڭ ورنى ەرەكشە. ەلدەرىمىز بۇدان دا بيىك تابىستارعا جەتەدى دەپ ويلايمىن. قازاقستانعا ساپارىمدى ىقىلاسپەن ەسكە الامىن. ەكى ەلدىڭ مىزعىماس دوستىق بايلانىستارى ۇزاق جىلعا ۇلاساتىنىنا سەنىمدىمىن، - دەدى گەرمانيا پرەزيدەنتى.

ايتا كەتەلىك قاسىم-جومارت توقايەۆ گەرمانياعا رەسمي ساپارمەن بارعان ەدى. قازاقستان مەن گ ف ر پرەزيدەنتتەرى شاعىن قۇرامدا كەلىسسوز جۇرگىزدى.