توقايەۆ قىتاي كومپانياسىنىڭ باسشىسىمەن اقتوعايداعى زاۋىت قۇرىلىسىن تالقىلادى

اقوردانىڭ باسپا ءسوز قىزمەتىنىڭ حابارلاۋىنشا، قاسىم-جومارت توقايەۆ قازاقستاننىڭ يندۋستريالدىق الەۋەتىن دامىتۋعا China Nonferrous Metal Mining توبىنىڭ اتسالىسۋىن جوعارى باعالادى. كومپانيا حالىقارالىق تاۋ-كەن جانە مەتال وندىرىسىندە مول تاجىريبە جيناقتاعان.

پرەزيدەنت اقتوعاي كەن ورنىندا مىس بالقىتۋ زاۋىتى سالىنا باستاعانىن ەرەكشە ماڭىزدى وقيعا دەپ اتادى. بۇل جوبا اباي وبلىسىنىڭ ەكونوميكاسىن جانە قازاقستاننىڭ وڭدەۋ ونەركاسىبىن وركەندەتۋگە تىڭ سەرپىن بەرەدى.

مەملەكەت باسشىسى اتاپ وتكەندەي، قىتاي قازاقستاننىڭ ساۋدا-ينۆەستيتسيا سالالارىنداعى نەگىزگى ستراتەگيالىق جانە ەكونوميكالىق سەرىكتەستەرىنىڭ ءبىرى سانالادى، ال بۇگىن باستالعان زاۋىت قۇرىلىسى ەكى ەلدىڭ ىنتىماقتاستىعى قارقىندى ىلگەرىلەپ كەلە جاتقانىن كورسەتەدى.

CNMC باسشىسى ۆەن گاڭ اۋقىمدى جوبانى جۇزەگە اسىرۋعا سەنىم ارتقانى، سونداي-اق سالتاناتتى راسىمگە قاتىسقانى ءۇشىن قاسىم-جومارت توقايەۆقا العىس ايتتى.

ۆەن گان قازاقستان پرەزيدەنتىنە CNMC قۇرىلىس جۇمىستارىن جوعارى دەڭگەيدە جۇرگىزەتىنىن جانە وزىق تەحنولوگيالاردى قولدانا وتىرىپ، بەكىتىلگەن مەرزىمدە اياقتايتىنىن، سونداي- اق ونەركاسىپ پەن ەكولوگيالىق قاۋىپسىزدىك تالاپتارىن قاتاڭ ساقتايتىنىن جەتكىزدى.

ونىڭ ايتۋىنشا، جوبانى ىسكە اسىرۋ جاڭا جۇمىس ورىندارىن اشۋعا مۇمكىندىك بەرەدى، جەرگىلىكتى مامان دايارلاۋ جانە تاجىريبە الماسۋ سالالارىندا ىنتىماقتاستىقتى كەڭەيتەدى.

كەزدەسۋ سوڭىندا اتالعان زاۋىت قازاقستان مەن قىتاي اراسىنداعى ونەركاسىپتىك كووپەراتسيانىڭ تاعى ءبىر تابىستى ۇلگىسىنە اينالىپ، مەتاللۋرگيا مەن تەرەڭ وڭدەۋ باعىتىنداعى بىرلەسكەن جۇمىسقا جول اشاتىنى اتاپ ءوتىلدى.

ەسكە سالايىق، بۇعان دەيىن مەملەكەت باسشىسى تەلەكوپىر رەجيمىندە اقتوعاي مىس بالقىتۋ زاۋىتىنىڭ قۇرىلىسىن باستاۋ راسىمىنە قاتىسقانىن حابارلاعانبىز.