توقايەۆ قازاقستاندا شەتەلدىك ۋنيۆەرسيتەتتەر اشۋعا دايىن ەكەنىن مالىمدەدى
استانا. KAZINFORM - مەملەكەت باسشىسى قازاقستاندا شەتەلدىك جوعارى وقۋ ورىندارىنىڭ فيليالدارى مەن كامپۋستارىن اشۋعا قولداۋ كورسەتۋگە دايىن ەكەنىن ايتتى. ونىڭ سوزىنشە، كەلەسى جىلى استانادا ءبىرقاتار جاڭا كامپۋس ىسكە قوسىلادى. بۇل تۋرالى اقوردا ءمالىم ەتتى.
مەملەكەت باسشىسى بۇگىنگى پىكىرتالاس ىنتىماقتاستىقتىڭ جاڭا كەزەڭىنە جول اشىپ، ناقتى ىسكە ۇلاساتىنىنا سەنىم ءبىلدىردى.
- ەڭ الدىمەن ءبىز ناقتى ينفراقۇرىلىم قالىپتاستىرامىز، ياعني ۋنيۆەرسيتەتتەرگە قاجەتتى كامپۋستار سالامىز. ماسكەۋ حالىقارالىق قاتىناستار ينستيتۋتىن، سونداي-اق كارديفف ۋنيۆەرسيتەتىن وتە جاقسى مىسال رەتىندە اتاپ وتتىك. كەلەسى جىلى استانادا ءبىرقاتار كامپۋستى ىسكە قوسامىز. اتالعان جۇمىس جالعاسا بەرۋگە ءتيىس. ويتكەنى بۇل - ءبىز ءۇشىن اسا ماڭىزدى باسىمدىق. ەلوردادا نەمەسە ەلىمىزدىڭ باسقا وڭىرىندە فيليالىن اشقىسى كەلەتىن كەز كەلگەن ۋنيۆەرسيتەتكە قولداۋ كورسەتۋگە ءازىرمىن. فورۋم مىنبەرىندە ايتقانىمداي، ءبىز قازاقستاندا ساراپشىلار الەۋەتى، ءبىلىم مەن تاجىريبە شوعىرلانعانىن قالايمىز. سوعان مۇددەلىمىز. سول سەبەپتى عىلىم، ءبىلىم مەن جوعارى تەحنولوگيالار ءبىز ءۇشىن وتە وزەكتى، - دەدى قاسىم-جومارت توقايەۆ.
دوڭگەلەك ۇستەل بارىسىندا ماسكەۋ مەملەكەتتىك حالىقارالىق قاتىناستار ينستيتۋتىنىڭ رەكتورى اناتوليي توركۋنوۆ، سولتۇستىك قىتاي سۋ رەسۋرستارى جانە ەلەكتر ەنەرگەتيكاسى ۋنيۆەرسيتەتىنىڭ پرەزيدەنتى ليۋ تسزيۋنگو، كارديفف ۋنيۆەرسيتەتىنىڭ پرەزيدەنتى لارنەر ۆەندي، سەۋل كيبەرۋنيۆەرسيتەتىنىڭ پرەزيدەنتى لي ىندجۋ، ءۇرىمجى كاسىبي ۋنيۆەرسيتەتىنىڭ پرەزيدەنتى گى چەنگۋان، انحالت ۋنيۆەرسيتەتىنىڭ پرەزيدەنتى يورگ باگدان، گازي ۋنيۆەرسيتەتىنىڭ رەكتورى ۋگۋر ۋنال جانە ۇلتتىق يادرولىق زەرتتەۋ ۋنيۆەرسيتەتىنىڭ رەكتورى ۆلاديمير شەۆچەنكو ءسوز سويلەدى.
ايتا كەتەيىك، پرەزيدەنت قاسىم-جومارت توقايەۆ حالىقارالىق ۇيىمدار جانە جەتەكشى شەتەلدىك ۋنيۆەرسيتەتتەر باسشىلارىمەن وتكەن دوڭگەلەك ۇستەلگە قاتىستى.