توقايەۆ كورەي پرەزيدەنتىنىڭ قازاقستانعا ساپارىن تاريحي وقيعا دەپ باعالادى

استانا. KAZINFORM - قازاقستان مەن كورەيا اراسىنداعى قارىم-قاتىناس تىڭ سەرپىنمەن ءارى قارقىندى دامىپ كەلەدى.

Президент
Фото: Виктор Федюнин/ Kazinform

بۇل تۋرالى اقوردادا ەلىمىزگە ۇشكۇندىك مەملەكەتتىك ساپارمەن كەلگەن وڭتۇستىك كورەيا پرەزيدەنتى يۋن سوك يەلمەن كەڭەيتىلگەن قۇرامداعى كەلىسسوز بارىسىندا مەملەكەت باسشىسى قاسىم-جومارت توقايەۆ ايتتى.

«بۇل - ءسىزدىڭ قازاقستانعا جاساعان العاشقى مەملەكەتتىك ساپارىڭىز. مۇنى تاريحي وقيعا دەپ باعالايمىز. ءبىز وڭتۇستىك كورەيانىڭ ەكونوميكالىق جەتىستىكتەرىنە جانە كورەي حالقىنىڭ مادەنيەتى مەن داستۇرىنە ەرەكشە قىزىعۋشىلىقپەن قارايمىز. قازىرگى تاڭدا ەلدەرىمىز اراسىنداعى قارىم-قاتىناس تىڭ سەرپىنمەن ءارى قارقىندى دامىپ كەلەدى دەپ نىق سەنىممەن ايتۋعا بولادى. ءبىز ءوزارا قارىم-قاتىناستا ۇلتتىق مۇددەلەرىمىزدى قۇرمەتتەيمىز. سونىڭ ارقاسىندا ىنتىماقتاستىقتىڭ ءتيىمدى ۇلگىسىن قالىپتاستىردىق. بۇگىن قول قويىلاتىن ءبىرقاتار قۇجات پەن بىرلەسكەن مالىمدەمە سونىڭ ايقىن دالەلى. بۇگىنگى كەلىسسوزدەر قازاق-كورەي ىقپالداستىعىنىڭ اياسىن كەڭەيتىپ، ەكىجاقتى بايلانىستى جاڭا بەلەسكە كوتەرەدى دەپ سەنەمىن. بۇگىنگى وقيعانى مەملەكەتتەرىمىز اراسىنداعى ايرىقشا سەنىمدى قارىم-قاتىناستىڭ بەلگىسى رەتىندە باعالايمىن»، - دەپ اتاپ ءوتتى قازاقستان پرەزيدەنتى.

مەملەكەت باسشىسى كورەي پرەزيدەنتىنىڭ ساپارى ەكى ەلدىڭ دوستىق پەن ءوزارا قولداۋعا نەگىزدەلگەن سەرىكتەستىگىن نىعايتۋدىڭ جاقسى مۇمكىندىگى ەكەندىگىن باسا ايتتى.

Республика Корея намерена вместе продвигаться к процветающему будущему с Казахстаном — Президент Юн Сок Ёль
Фото: Виктор Федюнин / Kazinform

ءوز كەزەگىندە يۋن سوك يەل قازاقستان پرەزيدەنتىمەن العاش رەت وتكەن جىلدىڭ قىركۇيەگىندە نيۋ-يوركتە كەزدەسكەنىن ەسكە الىپ، استانادا تاعى دا جۇزدەسكەنىنە قۋانىشتى ەكەنىن ايتتى.

«بيىل كورەيا رەسپۋبليكاسى مەن قازاقستان اراسىنداعى ستراتەگيالىق سەرىكتەستىكتىڭ 15 جىلدىعىن اتاپ وتەمىز. سوندىقتان دا بۇل مەملەكەتتىك ساپارعا ايرىقشا ءمان بەرەمىز. كورەيا رەسپۋبليكاسى مەن قازاقستان ديپلوماتيالىق قارم-قاتىناس ورناتىلعان 1992 -جىلدان بەرگى 32 جىلدىڭ ىشىندە ەكىجاقتى قاتىناستى ايتارلىقتاي دامىتۋعا قول جەتكىزدى. بۇگىندە كوپتەگەن كورەيلىك كومپانيا قازاقستان نارىعىندا تابىستى جۇمىس ىستەپ، ەكونوميكانى، ونەركاسىپتى دامىتۋعا، مەملەكەتتىك ينفراقۇرىلىمدى كەڭەيتۋگە ءوز ۇلەسىن قوسىپ وتىر. مۇنان بولەك، ءبىز ەكى ەل اراسىنداعى اسا ماڭىزدى مينەرالدى رەسۋرستار، ەنەرگەتيكا، گۋمانيتارلىق جانە مادەني الىس-بەرىس سالالارىن قوسا العانداعى ىنتىماعىمىزدىڭ كوكجيەگىن كەڭەيتىپ كەلەمىز. ەكولوگيا، مەديتسينا، ءبىلىم سالالارىنداعى ىنتىماق كۇن سايىن قارقىندى دامىپ كەلەدى»، - دەدى كورەيا پرەزيدەنتى.

مارتەبەلى مەيمان ءوزىنىڭ ورتالىق ازياعا ساپارى قارساڭىندا كورەيا رەسپۋبليكاسىنىڭ ۇكىمەتى كورەيانىڭ و ا ەلدەرىنە قاتىستى العاشقى ديپلوماتيالىق ستراتەگياسىن جاريا ەتكەنىن ايتتى. ستراتەگيا كورەيا رەسپۋبليكاسى - ورتالىق ازيا ىنتىماقتاستىق باستاماسى دەپ اتالادى.

«اتالعان باستاما ىنتىماقتاستىقتىڭ 3 قاعيداتىن قامتيدى: سەرىكتەسۋ، بىرىگۋ جانە جاسامپازدىق. كورەيدىڭ الدىڭعى قاتارلى تەحنولوگيالارى مەن سيفرلىق مۇمكىندىكتەرىنە ارقا سۇيەي وتىرىپ، كورەيا رەسپۋبليكاسى مەن ورتالىق ازيا ەلدەرى ىنتىماقتىڭ جاڭا جولىن تابۋعا ۇمتىلاتىن بولادى»، - دەدى يۋن سوك يەل.

اۆتور

مارلان جيەمباي

سوڭعى جاڭالىقتار