توقايەۆ پەن كورول فيليپپ قازاقستان-بەلگيا ىسكەرلىك كەڭەسىنىڭ ءتورتىنشى وتىرىسىنا قاتىستى

پرەزيدەنت مارتەبەلى مەيمانداردىڭ وسى ءىس-شاراعا قاتىسۋى تاتۋ دوستىق پەن ەكىجاقتى سەرىكتەستىكتى جاڭا ءارى ساپالى دەڭگەيگە شىعارۋعا دەگەن ورتاق ۇمتىلىستى كورسەتەتىنىن اتاپ ءوتتى.

قاسىم-جومارت توقايەۆ بەلگيا قازاقستان ەكونوميكاسىنداعى 10 ءىرى ينۆەستوردىڭ قاتارىنا كىرەتىنىن ايتتى. سوڭعى جيىرما جىلدا بەلگيالىق كومپانيالار ەكونوميكامىزعا 15 ميلليارد دوللاردان استام قارجى قۇيعان.

- ەلىمىزدە اگروونەركاسىپ كەشەنى، دەنساۋلىق ساقتاۋ، فارماتسيەۆتيكا، وزىق تەحنولوگيالار مەن ەنەرگەتيكا سالالارىندا 100 دەن استام بەلگيالىق جانە بىرلەسكەن كاسىپورىن تابىستى جۇمىس ىستەيدى. ولاردىڭ قاتارىندا Jan De Nul ،Sarens جانە Ahlers سياقتى جەتەكشى بەلگيالىق كومپانيالار بار. ەكىجاقتى ساۋدا كولەمىنىڭ ءوسىپ كەلە جاتقانى قۋانتادى. بيىلعى 8 ايدىڭ قورىتىندىسى بويىنشا ەكى ەل اراسىنداعى ساۋدا- ساتتىق شامامەن 10 پايىزعا ءوستى. سونىمەن قاتار ساۋدا ۇدەرىستەرىن جەڭىلدەتۋ جانە تاۋار اينالىمى ءوسىمىن ارتتىرۋ ءۇشىن ءالى دە كوپ جۇمىس اتقارۋىمىز قاجەت. سوندا عانا حالىقتارىمىزدىڭ قالاۋىنا قول جەتكىزەتىنىمىزگە سەنىمدىمىن. قازاقستان بەلگيانىڭ ورتالىق ازيا ايماعىنداعى ءىرى ساۋدا سەرىكتەسى سانالادى، - دەدى مەملەكەت باسشىسى.

پرەزيدەنت ەكىجاقتى ساۋدا- ەكونوميكالىق بايلانىستاردى كەڭەيتۋگە كورول فيليپپتىڭ ايرىقشا ۇلەس قوسقانىنا توقتالدى.

- ءسىز 16 جىل بۇرىن قازاقستانعا ساۋدا ميسسياسىن باستاپ كەلدىڭىز. بۇل قادام ەلدەرىمىزدىڭ ىسكەر توپتارى اراسىنداعى ۇزاقمەرزىمدى ىقپالداستىققا بەرىك نەگىز قالادى. ءسىزدىڭ بەلگيا بيزنەسىنە كورسەتىپ كەلە جاتقان قولداۋىڭىز سەرىكتەستىگىمىزدى ىلگەرىلەتۋگە زور ىقپال ەتتى. دەگەنمەن ىنتىماقتاستىقتى ودان ءارى جانداندىرۋعا الەۋەتىمىز جەتكىلىكتى، - دەدى مەملەكەت باسشىسى.