توقايەۆ «جەتىسۋ» ۆولەيبول كلۋبىنىڭ جاي-كۇيىمەن تانىستى
استانا. KAZINFORM - پرەزيدەنت «جەتىسۋ» ۆولەيبول كلۋبىنىڭ وقۋ-جاتتىعۋ كەشەنىن ارالاپ كوردى، دەپ حابارلايدى اقوردانىڭ باسپا ءسوز قىزمەتى.
بيىل پايدالانۋعا بەرىلگەن عيماراتتىڭ قۇرىلىسىنا 1,2 ميلليارد تەڭگە جۇمسالعان.
اۋدانى 1639,4 شارشى مەتر بولاتىن نىسان ەكى بلوكتان تۇرادى. ءۇش قاباتتى نەگىزگى عيمارات ۆولەيبولدان وقۋ-جاتتىعۋ ساباقتارىن، دەنە شىنىقتىرۋ-ساۋىقتىرۋ پروتسەستەرىن وتكىزۋگە ارنالعان.
كەشەندە سپورت جانە جاتتىعۋ زالدارى، مەديتسينالىق، اكىمشىلىك كابينەتتەرى بار.
مەملەكەت باسشىسى سپورتشىلارعا ارنالعان تۇرعىنجايمەن تانىستى. وندا پاتەرلەردەن بولەك، اسحانا، وقۋ كابينەتتەرى مەن دەمالىس ايماعى قاراستىرىلعان. جەكە ينۆەستور سالعان عيماراتتىڭ اۋدانى - 3866,5 شارشى مەتر.
قاسىم-جومارت توقايەۆ ماماندارمەن جانە سپورتشىلارمەن اڭگىمەلەسىپ، كوماندانىڭ جاقسى ويىن ۇلگىسىن كورسەتىپ جۇرگەنىن اتاپ ءوتتى.
سونداي-اق وسىعان دەيىن الماتى قالاسىندا جاتتىعىپ كەلگەن كلۋبتىڭ ەندى وبلىستا دايىندىق جاساي الاتىنىنا نازار اۋداردى. ءسوز سوڭىندا سپورتشىلارعا حالىقارالىق دەڭگەيدە ونەر كورسەتۋ قاجەت ەكەنىن ايتىپ، الداعى جارىستاردا جەڭىسكە جەتۋلەرىنە تىلەكتەستىك ءبىلدىردى.
كوماندا مۇشەلەرى قولايلى جاعداي جاسالعانى ءۇشىن مەملەكەت باسشىسىنا العىس ايتىپ، ۆولەيبول دوبىنا قولتاڭبا قالدىرۋىن سۇرادى.
بۇعان دەيىن مەملەكەت باسشىسى ىنتىماق اۋىلىنداعى №30 ورتا مەكتەپتى ارالاپ كوردى.
اينۇر تۋماكبايەۆا
اۆتور
