توقايەۆ جامبىل وبلىسىنداعى جۇگەرى وڭدەۋ زاۋىتىن ىسكە قوسۋ راسىمىنە قاتىستى

اقوردانىڭ حابارلاۋىنشا، جوبانى الەمدەگى بيولوگيالىق اشىتۋ سالاسى كوشباسشىلارىنىڭ ءبىرى - قىتايلىق Fufeng Group كومپانياسى ىسكە اسىرادى. وندىرىستىك كەشەندى ينۆەستيتسيالاۋدىڭ العاشقى كەزەڭىنە 350 ميلليون دوللار جۇمسالدى. كاسىپورىن جىلىنا 500 مىڭ تونناعا دەيىن جۇگەرى وڭدەي الادى.

ەكىنشى كەزەڭدە كاسىپورىننىڭ جۇگەرى وڭدەۋ قۋاتىن جىلىنا 3 ميلليون تونناعا دەيىن ۇلعايتۋ جانە شىعارىلاتىن ءونىم تۇرلەرىن ارتتىرۋ قاراستىرىلعان. بۇل كەزەڭدەگى ينۆەستيتسيانىڭ جالپى كولەمى 1,15 ميلليارد دوللار بولادى.

- ونەركاسىپ پاركىن قۇرۋ 1,5 مىڭعا جۋىق جۇمىس ورنىن اشۋعا جانە ەلىمىزدە جۇگەرى ءدانىن تەرەڭ وڭدەۋ بويىنشا تولىق وندىرىستىك تسيكلدى قالىپتاستىرۋعا مۇمكىندىك بەرەدى، - دەلىنگەن حابارلامادا.

سونىمەن قاتار اۋىل شارۋاشىلىعى شيكىزاتىن تەرەڭ وڭدەۋدى ىلگەرىلەتۋگە، قىتايمەن ونەركاسىپتىك ىنتىماقتاستىقتى كەڭەيتۋگە، سونداي-اق وتاندىق اگروونەركاسىپ سالاسىنىڭ ەكسپورتتىق الەۋەتىن نىعايتۋعا سەپتىگىن تيگىزەدى.

ەسكە سالايىق، مۇنىڭ الدىندا قاسىم-جومارت توقايەۆ قازاقستان مەن قىتايدىڭ ساۋدا اينالىمىن 100 ميلليارد دوللارعا جەتكىزۋ كوزدەلىپ وتىرعانىن ايتقان ەدى.