توقايەۆ ج ي قولدانعان فيلمدەردىڭ حالىقارالىق كينوفەستيۆالىنىڭ اشىلۋ سالتاناتىنا قاتىستى

- «Astana AI Film Festival» - ىزدەنىمپاز، ءبىلىمپاز، جاڭاشىل، جاسامپاز ازاماتتار سىنعا تۇسەتىن، بۇرىن-سوڭدى بولماعان بىرەگەي جوبا. بۇل - ۇشقىر وي مەن تىڭ باستامالاردىڭ باسەكەسى. قازىرگى زامان - ءبىلىم مەن عىلىمنىڭ جانە وزىق يننوۆاتسيانىڭ ءداۋىرى. جاساندى ينتەللەكت الەم ەكونوميكاسىنىڭ بارلىق سالاسىنا تۇبەگەيلى وزگەرىستەر اكەلۋدە. ءبىر سوزبەن، تەحنولوگيالىق ىلگەرىلەۋ، ياعني پروگرەسس جاپپاي جاھاندىق سيپاتقا يە بولدى، - دەدى قاسىم-جومارت توقايەۆ.

مەملەكەت باسشىسىنىڭ ايتۋىنشا، وسى بىرەگەي جوبا - ەلىمىزدەگى كرەاتيۆتى يندۋستريا سالاسىنىڭ قارقىندى دامۋىنىڭ جارقىن كورىنىسى. قازاقستان بۇل باعىتتا ءبىرتۇتاس ەكوجۇيە قۇرۋ ءۇشىن ناقتى شارالار قابىلداپ جاتىر. سونىمەن قاتار دارىندى ازاماتتارعا جان-جاقتى قولداۋ كورسەتىلەدى.

پرەزيدەنت جاساندى ينتەللەكتىنى جاۋاپكەرشىلىكپەن قولدانۋدىڭ وزەكتىلىگىنە توقتالدى.

- تەحنولوگيا بۇرىن-سوڭدى بولماعان قارقىنمەن دامىپ جاتقان تۇستا ساياساتكەرلەر، عالىمدار مەن سالا كوشباسشىلارى جاساندى ينتەللەكت مۇمكىندىكتەرىنىڭ جانە ونى باقىلاۋسىز قولدانۋدىڭ قاتەرى ارتا تۇسكەنىنە الاڭداۋلى. ءبىر انىعى، بۇل ۇدەرىستى توقتاتۋ مۇمكىن ەمەس. مەنىڭ ويىمشا، وعان ەشكىمنىڭ تالاسى جوق. ادامزات تاريحىندا پرومەتەي الاۋى وركەندەۋدىڭ نىشانى بولۋمەن قاتار دۇلەي كۇش رەتىندە دە قاراستىرىلدى. يادرولىق ەنەرگەتيكاعا قاتىستى دا وسى مىسالدى كەلتىرۋگە بولادى. سوندىقتان ەڭ اۋەلى قاۋىپسىزدىككە باسا نازار اۋدارىپ، جاساندى ينتەللەكتىنى دامىتۋ مەن جاۋاپكەرشىلىكپەن قولدانۋ ەرەجەسىن ازىرلەگەنىمىز ءجون. بۇل وسكەلەڭ ۇرپاقتىڭ الاڭسىز كەلەشەگى ءۇشىن قاجەت. بولاشاق تەحنولوگياسىنىڭ زور شىعارماشىلىق الەۋەتىن يگىلىككە جاراتۋ ءۇشىن قولدان كەلگەننىڭ ءبارىن جاساۋىمىز كەرەك. بۇگىنگى فەستيۆالدىڭ باستى يدەياسى دا وسى، - دەدى ول.