توقايەۆ شەتەلدىك ۋنيۆەرسيتەتتەرگە جاڭا مىندەت جۇكتەدى

استانا. KAZINFORM - پرەزيدەنت قاسىم-جومارت توقايەۆ حالىقارالىق ۇيىمدار جانە جەتەكشى شەتەلدىك ۋنيۆەرسيتەتتەر باسشىلارىمەن وتكەن دوڭگەلەك ۇستەلگە قاتىستى.

Тоқаев
Фото: Ақорда

اقوردانىڭ باسپا ءسوز قىزمەتىنىڭ حابارلاۋىنشا، مەملەكەت باسشىسى بۇل جيىن سەرىكتەستىكتى جاڭا ءارى ساپالى دەڭگەيگە كوتەرۋگە مۇمكىندىك بەرەتىنىن اتاپ ءوتتى.

- بۇگىندە مۇنىڭ ماڭىزى ارتا ءتۇستى. قازىرگى گەوساياسي شيەلەنىس ءبىلىم مەن تەحنولوگيا سالالارىنا دا اسەر ەتىپ وتىر. عىلىمي ىنتىماقتاستىق قاۋىپسىزدىك تۇرعىسىنان قاراستىرىلا باستادى. وزىق جەتىستىكتەردى ورتاق يگىلىك ەمەس، باسەكەلەستىك قۇرالى رەتىندە قابىلداۋ جيىلەدى. بۇعان ءبىلىم مەن تەحنولوگيا دامۋدىڭ نەگىزگى قوزعاۋشى كۇشىنە اينالعان كەزەڭدە كۋا بولىپ وتىرمىز. جاساندى ينتەللەكت، جاڭا ماتەريالدار، ەنەرگەتيكالىق جانە بيوتەحنولوگيالار ەكونوميكانى، ەڭبەك نارىعىن، سونداي-اق ءبىلىم بەرۋ جۇيەسىن وزگەرتىپ جاتىر، - دەدى قاسىم-جومارت توقايەۆ.

پرەزيدەنت ءبىلىمنىڭ جاڭا باعىتتارىن يگەرۋگە، بىلىكتى مامان دايارلاۋعا جانە عىلىمي يدەيالاردى تەحنولوگياعا اينالدىرۋعا قابىلەتتى ەلدەر عانا تابىسقا جەتە الاتىنىنا نازار اۋداردى.

- ءبىز ەلىمىزدى حالىقارالىق قوعامداستىقتىڭ جاۋاپتى مۇشەسى ءارى ءتۇرلى وڭىرلەردى بايلانىستىراتىن كوپىر رەتىندە تانىتا الدىق. ادام كاپيتالىن دامىتۋ، ءبىلىم- عىلىمدى جانە يننوۆاتسيانى ىلگەرىلەتۋ - ۇلتتىق ستراتەگيامىزدىڭ نەگىزگى باعىتتارى. تاعى دا اتاپ وتكىم كەلەدى، بۇل باسىمدىقتار ەلىمىزدىڭ تاريحىندا العاش رەت كونستيتۋتسيامىزدا مەملەكەتتىڭ ستراتەگيالىق ماقساتتارى رەتىندە بەكىتىلدى. قازاقستان حالقىنا ارناعان بيىلعى جولداۋىمدا تەحنولوگيالىق جاڭارۋدى جەدەلدەتۋ، عىلىم مەن ءوندىرىس اراسىنداعى بايلانىستى نىعايتۋ، سونداي- اق ازاماتتارىمىزدى جاڭا تسيفرلىق ەكونوميكاعا بەيىمدەۋ قاجەتتىگىنە باسا ءمان بەردىم. بۇل ماقساتقا قول جەتكىزۋ جەكەلەگەن باستامالاردى ەمەس، كەرىسىنشە مەملەكەتتىڭ، ۋنيۆەرسيتەتتەر مەن بيزنەستىڭ دايەكتى ءارى ۇيلەسىمدى ارەكەت ەتۋىن تالاپ ەتەدى، - دەدى مەملەكەت باسشىسى.

قاسىم-جومارت توقايەۆ قازاقستان الەمنىڭ جەتەكشى ۋنيۆەرسيتەتتەرى مەن عىلىمي-زەرتتەۋ ورتالىقتارىمەن ارىپتەستىك ورناتۋعا قاشاندا دايىن ەكەنىن ايتتى.

- وزدەرىڭىز كورىپ وتىرعانداي، جۇمىستىڭ باستاپقى كەزەڭى اياقتالدى. قاجەتتى ينفراقۇرىلىم جاسالدى، سەرىكتەستىك كەلىسىمدەر رەسمي تۇردە رەسىمدەلدى جانە كوپ ۇزاماي شەتەلدىك ۋنيۆەرسيتەتتەردىڭ فيليالدارى جۇمىسقا تولىق كىرىسەدى. ەندىگى قادام - ەكونوميكامىزعا قاجەتتى بىرلەسكەن زەرتتەۋلەر جۇرگىزۋ، جاڭا تەحنولوگيالار ازىرلەۋ جانە ناقتى شەشىمدەر ەنگىزۋ ارقىلى ىنتىماقتاستىعىمىزدىڭ مازمۇنىن بايىتۋ، - دەدى پرەزيدەنت.

وسى ورايدا مەملەكەت باسشىسى ىقپالداستىقتىڭ باسىم باعىتتارىنا توقتالدى.

- اۋەلگى كەزەكتە - سۋ قاۋىپسىزدىگى. بۇل - ورتالىق ازيا ءۇشىن ەكونوميكالىق جانە الەۋمەتتىك تۇراقتىلىق ماسەلەسى. ءتىپتى مۇنى تىرشىلىك ءۇشىن كۇرەس ماسەلەسى دەر ەدىم. ترانسشەكارالىق وزەندەردى باسقارۋ، زاماناۋي مونيتورينگ جۇيەسىن قۇرۋ، سۋ ۇنەمدەۋ تەحنولوگيالارىن ەنگىزۋ جانە عىلىمي تۇرعىدان نەگىزدەلگەن سۋ ديپلوماتياسىن دامىتۋ ءتۇرلى ەلدەردىڭ ساراپشىلىق الەۋەتىن بىرىكتىرۋدى قاجەت ەتەدى. وسى رەتتە بىرىككەن ۇلتتار ۇيىمى ۋنيۆەرسيتەتىنىڭ تاجىريبەسى مەن مۇمكىندىكتەرىنە ارقا سۇيەيمىز، - دەدى قاسىم-جومارت توقايەۆ.

ەسكە سالايىق، بۇعان دەيىن پرەزيدەنت قاسىم-جومارت توقايەۆ قازىرگى بۇلىڭعىر زاماندا الەمدىك ۋنيۆەرسيتەتتەر قاۋىمداستىعى وزدەرىنىڭ سالماقتى پىكىرلەرى مەن ۇستانىمدارىن جەتكىزۋى كەرەك ەكەنىن ايتقان ەدى.