توقايەۆ بالقاش ا ە س قۇرىلىسىن كەلەر جىلى باستاۋدى ۇسىندى
استانا. KAZINFORM - مەملەكەت باسشىسى قاسىم-جومارت توقايەۆ كەلەر جىلى «بالقاش» اتوم ەلەكتر ستانسياسىنىڭ قۇرىلىسىن باستاۋدى، سونداي-اق «مويىنقۇم» ا ە س- ءىنىڭ قۇرىلىسىن جەدەلدەتۋ ءۇشىن كەشەندى ىنتىماقتاستىق تۋرالى كەلىسىمگە قول قويۋدى ۇسىندى.
پرەزيدەنت اتوم ەنەرگەتيكاسىن دامىتۋ ايرىقشا ماڭىزدى ەكەنىن ەسكە سالدى.
- جالپىحالىقتىق رەفەرەندۋمنىڭ قورىتىندىسى بويىنشا اتوم ەلەكتر ستانسياسىن، ءتىپتى بىردەن بىرنەشە ستانسيا سالۋ تۋرالى دۇرىس شەشىم قابىلداندى. ەندى اتوم ەلەكتر ستانسيالارىن الداعى ەلۋ جىلدا جانە ودان كەيىن دە ۋران شيكىزاتىمەن قالاي قامتاماسىز ەتەتىنىمىزدى ويلاستىرۋ كەرەك، - دەدى قاسىم-جومارت توقايەۆ قازاقستان حالقىنا جولداۋىندا.
پرەزيدەنت قازاقستانداعى ا ە س- تەردىڭ قاجەتتىلىگىن الداعى ءجۇز جىل بويى وتەۋگە مۇمكىندىك بەرەتىن مەملەكەتتىك ستراتەگيالىق ۋران قورىن قۇرۋ ۇسىنىسىن بايىپپەن قاراستىرۋعا تۇرارلىق ەكەنىن ايتتى.
- ا ە س سالۋعا قاتىسىپ جاتقان شەتەلدىك سەرىكتەستەردى قازاقستاندا جوعارى تەحنولوگيالى وندىرىستەر اشۋعا، يادرولىق ەنەرگەتيكا سالاسىنداعى ءبىلىم مەن تاجىريبەنى بەرۋگە، وتاندىق اتوم سالاسى ماماندارىن دايارلاۋعا تارتۋ ماڭىزدى. مۇنداي ۇسىنىستاردى رەسەي مەن قىتاي كومپانيالارى ءدا بىلدىرىپ وتىر. كەلەر جىلدىڭ وزىندە «بالقاش» ا ە س- ءىنىڭ قۇرىلىسىن باستاۋدى، سونداي-اق «مويىنقۇم» ا ە س- ءىنىڭ قۇرىلىسىن مۇمكىندىگىنشە تەزىرەك قولعا الۋ ءۇشىن كەشەندى ىنتىماقتاستىق تۋرالى كەلىسىمگە قول قويۋدى ورىندى، ءتىپتى قاجەت دەپ سانايمىن، - دەدى مەملەكەت باسشىسى.
بۇل رەتتە كەلىسسوزدەردەگى بارلىق ۇستانىم قازاقستاننىڭ ۇلتتىق مۇددەلەرىن ەسكەرە وتىرىپ، مۇقيات پىسىقتالىپ، كەلىسىلۋى كەرەگى ايتىلدى.
بۇعان دەيىن پرەزيدەنت ۇلتتىق قوردىڭ ەڭ باستى ميسسياسىن اتاعان ەدى.
سونداي-اق توقايەۆ قازاقستاننىڭ ترانزيتتىك الەۋەتىن سىنعا الدى.
