توقايەۆ بانكتەردەگى جيناقتاردى ەكونوميكانى دامىتۋعا باعىتتاۋدى تاپسىردى

- قارجى نارىعىن رەتتەۋشى مەكەمەلەر دە ءوز مىندەتتەرىن ساپالى ءارى ءتيىمدى ورىنداۋعا ءتيىس. بۇگىندە قازاقستاننىڭ قارجى جۇيەسى ايتارلىقتاي ورنىقتى دەڭگەيدە. وعان دالەل: ەلىمىزدەگى بانكتەردىڭ اكتيۆى 75 تريلليون تەڭگەدەن استى. دەپوزيتتەردىڭ كولەمى رەكوردتىق كورسەتكىشكە، ناقتى ايتقاندا، 52 تريلليون تەڭگەگە جەتتى، - دەدى مەملەكەت باسشىسى.

پرەزيدەنتتىڭ اتاپ وتۋىنشە، سالىمداردىڭ 78 پايىزى ۇلتتىق ۆاليۋتادا ساقتالعان. بۇل ۇلتتىق تەڭگەنىڭ قۇندىلىعى ارتا تۇسكەنىن كورسەتەدى.

- ەندىگى ماڭىزدى مىندەت - جيناقتالعان قارجى رەسۋرستارىن ەكونوميكانىڭ ناقتى سەكتورىن دامىتۋعا پايدالانۋ. وسىعان وراي، ۇلتتىق بانككە باعا مەن قارجى تۇراقتىلىعىن قامتاماسىز ەتۋمەن قاتار، ەكونوميكانى دامىتۋعا جول اشاتىن باستامالاردى جۇزەگە اسىرۋعا دا اتسالىساتىن كەز كەلدى، - دەدى قاسىم-جومارت توقايەۆ.

بۇعان دەيىن مەملەكەت باسشىسى ەل ومىرىندەگى تاريحي وزگەرىستەردىڭ بارلىعى حالىقتىڭ كوز الدىندا بولىپ جاتقانىن ايتقان ەدى.

كاپيتال نارىعىنىڭ مۇمكىندىكتەرىن ايتارلىقتاي كەڭەيتۋ قاجەت
مەملەكەت باسشىسىنىڭ ايتۋىنشا، ەكونوميكانىڭ نەگىزگى سەكتورلارىن ۇزاق مەرزىمدى كرەديتتەۋدىڭ جاڭا تەتىكتەرىن ىسكە قوسۋ قاجەت. بۇل ۇدەرىسكە بانكتەر، دامۋ ينستيتۋتتارى، حالىقارالىق قارجى ۇيىمدارى جانە ب ج ز ق تارتىلۋى ءتيىس.
سونىمەن قاتار پرەزيدەنت كاپيتال نارىعىنىڭ مۇمكىندىكتەرىن ايتارلىقتاي كەڭەيتۋ قاجەت ەكەنىن ايتتى. وسىعان بايلانىستى، جەكە كاسىپورىنداردى بيرجالىق قۇرالداردى بەلسەندى قولدانۋعا ىنتالاندىرۋ ماڭىزدى.
قوسىمشا قارجىلاندىرۋ كوزدەرىن جۇمىلدىرۋ جانە ينۆەستيتسيالىق ءتارتىپتى نىعايتۋ - ماڭىزدى مىندەت. بۇل ءۇشىن ناقتى تەتىكتەر قازىرگى ۋاقىتتا ازىرلەنىپ جاتقان كاپيتال نارىعى تۋرالى زاڭ جوباسىنا ەنگىزىلۋى ءتيىس.
قاسىم-جومارت توقايەۆ ءبىرىڭعاي ۇلتتىق قارجى ەكوجۇيەسىن قۇرۋعا ەرەكشە نازار اۋدارۋ قاجەت ەكەنىن ايتتى. قازاقستان قور بيرجاسى، «استانا» حالىقارالىق قارجى ورتالىعى جانە Alatau City تىعىز سەرىكتەستىكتە جۇمىس ىستەۋى ءتيىس.

ينفلياتسيامەن جۇيەلى تۇردە كۇرەسۋ قاجەت - پرەزيدەنت

- سوڭعى جىلدارى ۇكىمەت بيۋدجەت پەن سالىق جۇيەسىن تولىعىمەن قايتا قارادى. ءبىراق مەملەكەتتىك ساياساتتىڭ تيىمدىلىگى، ەڭ الدىمەن، ازاماتتاردىڭ ءال-اۋقاتىنا، ەكونوميكالىق بەلسەندىلىگىنە قاراپ باعالانادى. سوندىقتان ءبىز ءۇشىن ەڭ ماڭىزدى ماقسات - حالىقتىڭ تابىسىن ۇلعايتۋ. ءول ۇشىن ءبىرىنشى كەزەكتە ينفلياتسيامەن جۇيەلى تۇردە كۇرەسۋ قاجەت. ينفلياتسيانى، بەينەلەپ ايتقاندا، ازاماتتارىمىزدىڭ ءال-اۋقاتىنا كۇن سايىن نۇقسان كەلتىرىپ وتىرعان ءۇنسىز جاۋ دەۋگە بولادى، - دەدى مەملەكەت باسشىسى.

سونىمەن قاتار، ول باعانىڭ ءوسۋ قارقىنى ءبىرشاما باسەڭدەگەنىن اتاپ ءوتتى. دەگەنمەن، ينفلياتسيا دەڭگەيى ءالى دە جوعارى.

- سوندىقتان، ەڭ الدىمەن، ۇكىمەت پەن ۇلتتىق بانك بىرلەسىپ، ۇيلەسىمدى جۇمىس ىستەۋى كەرەك. ينفلياتسيانى تەجەپ، تومەندەتۋ قاجەت. بۇل - اسا ماڭىزدى مىندەت. ۇكىمەت بيۋدجەت جانە سالىق ساياساتىن بارىنشا بايىپتى جۇرگىزۋى كەرەك. سونداي-اق ەكونوميكانىڭ وندىرىستىك الەۋەتىن كۇشەيتىپ، بيزنەستىڭ ونىمدىلىگىن ارتتىرۋ ءۇشىن قولايلى جاعداي جاساۋ قاجەت، - دەدى پرەزيدەنت.

ايتا كەتەيىك، بۇعان دەيىن پرەزيدەنت تسيفرلىق ەكونوميكانى قالىپتاستىرۋ شارالارى جونىندە مالىمدەگەن ەدى.