توقايەۆ اۋىل شارۋاشىلىعىنا قاتىستى بارلىق باعدارلامانى تەكسەرۋدى تاپسىردى

استانا. KAZINFORM - بىزگە باعدارلامانىڭ سانى ەمەس، اۋىل شارۋاشىلىعىنىڭ ساپالى دامىعانى كەرەك. بۇل تۋرالى اۋىل شارۋاشىلىعى ەڭبەككەرلەرىنىڭ Ⅲفورۋمىندا مەملەكەت باسشىسى قاسىم-جومارت توقايەۆ ايتتى.

а
Фото: Ақорда

- اۋىل تۇرعىندارىنىڭ تۇرمىس ساپاسىن ارتتىرۋ ءۇشىن ولارعا ءتيىستى جاعداي جاساۋ قاجەت. بۇل - دۇرىس. الايدا سوڭعى جىلدارى اۋىل شارۋاشىلىعىنا قاتىستى اتتارى بولەك، ءبىراق زاتتارى بىردەي باعدارلامالار تىم كوپ بولىپ كەتكەن سياقتى. ماسەلەن، قازىردىڭ وزىندە «اۋىل اماناتى»، «اۋىل - ەل بەسىگى»، «كەڭ دالا»، «بەرەكە»، «جايلاۋ»، «يگىلىك»، «سىباعا» بولعان ءبىر كەزدەرى جانە تاعى باسقا باعدارلامالار جۇزەگە اسىرىلدى. ارينە، ءار جوبا وسى سالاداعى وزەكتى ماسەلەلەردى شەشۋ ءۇشىن جاسالدى. ءبىراق سول جۇمىستىڭ ءبارى قانشالىقتى ءتيىمدى جۇزەگە اسىرىلىپ جاتىر؟ مەنىڭشە، بۇل - زاڭدى سۇراق. بىزگە باعدارلامانىڭ سانى ەمەس، اۋىل شارۋاشىلىعىنىڭ ساپالى دامىعانى كەرەك، - دەدى مەملەكەت باسشىسى.

سوندىقتان پرەزيدەنت ۇكىمەت اۋىل مەن اگرارلىق سەكتوردى قولداۋ ءۇشىن دايىندالعان وسىنداي قۇجاتتارعا جان- جاقتى تالداۋ جۇرگىزۋگە ءتيىس ەكەنىن باسا ايتتى.

- ءار باعدارلامانىڭ ءوز ماقساتى مەن مىندەتتى بولۋى قاجەت. ەڭ باستىسى، بۇل جۇمىس شارۋالارعا تۇسىنىكتى بولىپ، اۋىل تۇرعىندارىنىڭ تۇرمىس ساپاسىن جاقسارتۋعا ىقپال ەتۋى كەرەك. بۇل - مەملەكەت قارجىسىن ۇنەمدەۋ قاجەتتىلىگىنە تىكەلەي بايلانىستى ماسەلە، - دەدى قاسىم-جومارت توقايەۆ.

مەملەكەت باسشىسىنىڭ اتاپ وتۋىنشە، بۇل باعىتتا جۇمىس جۇرگىزىلىپ جاتىر. ءتيىستى مينيسترلىكتىڭ مالىمەتى بويىنشا، تەك بىلتىردىڭ وزىندە «اۋىل - ەل بەسىگى» باستاماسىمەن 500 گە جۋىق اۋىلدا 921 جوبا جۇزەگە اسىرىلدى. ولاردىڭ جالپى قۇنى - 173 ميلليارد تەڭگە.

بۇدان بولەك، 277 ەلدى مەكەندە سۋمەن جابدىقتاۋ جۇيەسى جاڭارتىلدى.

- ەندى وسى جۇمىستىڭ ناتيجەسىن تەكسەرۋ كەرەك سياقتى. نەگە مەن بۇل ماسەلەنى ارنايى قوزعاپ، قازبالاپ ايتىپ تۇرمىن؟ سەبەبى بۇرىن ءبارىمىز ادامداردى قۋانتاتىن، كەرەمەت، ءتىپتى ءمىنسىز اقپاراتتى كوپ تىڭدادىق. سونىڭ بارىنە قۋاندىق. سوسىن دۇرىس ستاتيستيكالىق مالىمەت بەرىلدى ەكەن دەپ، سىلتاۋ تاۋىپ، ماسەلەنى الىس سورەگە ىسىرىپ قويا سالاتىن ەدىك. ءبىز ونداي جاعدايعا جول بەرمەۋىمىز كەرەك، قۇرمەتتى ارىپتەستەر، - دەدى مەملەكەت باسشىسى.

پرەزيدەنت «حالىقتىق قۇرىلىس» باعدارلاماسى اۋىل ايماقتاردىڭ ودان ءارى دامۋىنا جاڭاشا سەرپىن بەرۋى تيىستىگىن باسا ايتتى.

- بۇل ورايدا اۋىلداردىڭ ءوسىپ-وركەندەۋىنە ۇلەس قوسىپ، تۇرعىنداردى تۇراقتى جۇمىسپەن قامتىپ وتىرعان كاسىپورىندارعا ايرىقشا نازار اۋدارۋ قاجەت. اسىرەسە ءىرى شارۋا قوجالىقتارى ورنالاسقان اۋداندارداعى ينجەنەرلىك جەلىلەردى جەتىلدىرىپ، ولاردىڭ ساپالى جۇمىسىنا قاجەتتى كىرەبەرىس جولداردى سالۋ كەرەك، - دەدى قاسىم-جومارت توقايەۆ.