توقايەۆ «اتلەتيكو مادريد» باس ديرەكتورىن «دوستىق» وردەنىمەن ماراپاتتادى
استانا. KAZINFORM - پرەزيدەنت قاسىم-جومارت توقايەۆ «اتلەتيكو مادريد» باس ديرەكتورى ميگەل انحەل حيل ماريندى II دارەجەلى «دوستىق» وردەنىمەن ماراپاتتادى.
اقوردانىڭ باسپا ءسوز قىزمەتىنىڭ حابارلاۋىنشا، قاسىم-جومارت توقايەۆ بۇل وردەندى ميگەل انحەل حيل مارينگە قازاقستاندا فۋتبولدىڭ دامۋىنا قوسقان ۇلەسى ءۇشىن تابىستادى.
ەسكە سالايىق، بۇعان دەيىن مەملەكەت باسشىسى «اتلەتيكو مادريد» باس ديرەكتورى ميگەل انحەل حيل ماريندى قابىلداعانىن حابارلاعانبىز.
پرەزيدەنت قاسىم-جومارت توقايەۆ «اتلەتيكو مادريد» فۋتبول كلۋبىمەن تابىستى ىنتىماقتاستىقتى جوعارى باعالاپ، ميگەل انحەل حيل ءماريننىڭ قازاقستانعا ساپارى سەرىكتەستىكتى جاڭا دەڭگەيگە كوتەرۋگە مۇمكىندىك بەرەتىنىن اتاپ ءوتتى.
مەملەكەت باسشىسىنىڭ ايتۋىنشا، قازاقستان زاماناۋي فۋتبول ينفراقۇرىلىمىنا، جاتتىعۋ بازاسىنا جانە جاس ويىنشىلاردى دايارلاۋ باعدارلاماسىنا بەلسەندى تۇردە ينۆەستيتسيا قۇيىپ جاتىر. سونىمەن قاتار ەلدەگى فۋتبول كلۋبتارىن جەكەشەلەندىرۋ ۇدەرىسى جالعاسۋدا.
بۇدان بولەك، پرەزيدەنت ف ي ف ا- مەن بىرگە بارلىق وڭىردە بالالارعا ارنالعان 100 دەن استام جاڭا فۋتبول الاڭىن سالۋ جۇمىستارى قولعا الىنعانىنا نازار اۋداردى.
