توقايەۆ اسكەردىڭ جاۋىنگەرلىك ازىرلىگى مەن قورعانىس بيۋجەتىنە قاتىستى تاپسىرما بەردى

اقوردانىڭ باسپا ءسوز قىزمەتىنىڭ حابارلاۋىنشا، مەملەكەت باسشىسى قارۋلى كۇشتەردىڭ قازىرگى قىزمەتى مەن جاۋىنگەرلىك ازىرلىگى، اسكەري دايارلىق ءىس-شارالارىن قارجىلاي قامتاماسىز ەتۋ، قورعانىس مينيسترلىگى بيۋجەتىنىڭ ورىندالۋى تۋرالى ەسەپتى تىڭدادى.

جوعارعى باس قولباسشىعا جاۋىنگەرلەردىڭ جاي-كۇيى مەن اسكەردى جۇمىلدىرۋ دايىندىعى، سونداي-اق ۆەدومستۆو ورگاندارىنا جانە ساربازدارعا جۇكتەلگەن مىندەتتەردىڭ ورىندالۋى تۋرالى باياندالدى.

- پرەزيدەنتكە اسكەردىڭ اعىمداعى قاجەتتىلىكتەرىن قارجىلاندىرۋ جانە ارميانى دامىتۋ باعدارلاماسى تۋرالى مالىمەت بەرىلدى. سونداي-اق اسكەري ازىرلىك مىندەتتەرىن ەسكەرە وتىرىپ قاراجاتتى قايتا ءبولۋ، ينفراقۇرىلىمدى جاراقتاندىرۋ جانە بولىمشەلەردىڭ كۇندەلىكتى قىزمەتىن قامتاماسىز ەتۋ ماسەلەلەرى تالقىلاندى، - دەلىنگەن حابارلامادا.

اسكەردى باسقارۋ جۇيەسىن جەتىلدىرۋ، شەشىم قابىلداۋ جەدەلدىگىن ارتتىرۋ جانە ساربازدىڭ ماماندانعان باعىتىنا قاراي مىندەتتەردى ورىنداۋعا دايىندىعىنا ايرىقشا ءمان بەرىلدى.

بۇدان بولەك، موبيليزاتسيانى جوسپارلاۋ جانە اسكەري رەزەرۆتى دايىنداۋ، جوسپارلانعان شىعىنداردى نەگىزدەۋ، بيۋجەت ءتارتىبىن ساقتاۋ، بولىنگەن قارجىنى پايدالانۋ تيىمدىلىگىن ارتتىرۋ ماسەلەلەرى، سونداي-اق قارجىلىق باقىلاۋ مەن شىعىستاردىڭ ناتيجەلىلىگىن باعالاۋ تاسىلدەرى قاراستىرىلدى.

كەزدەسۋ قورىتىندىسى بويىنشا مەملەكەت باسشىسى قارۋلى كۇشتەردىڭ ساقاداي ساي بولۋىنا جانە اسكەري ازىرلىك ساپاسىنا قاتىستى، سونىمەن قاتار ارميانىڭ ەڭ باستى قاجەتتىلىكتەرىن قارجىلىق تۇرعىدان وتەۋ جانە بيۋدجەت قاراجاتىن ۇتىمدى پايدالانۋ ماسەلەلەرى بويىنشا ءبىرقاتار مىندەت جۇكتەدى.

ەسكە سالايىق، بۇعان دەيىن تاتيانا ساۆەليەۆا قورعانىس ءمينيسترىنىڭ ورىنباسارى بولىپ تاعايىندالعانىن حابارلاعانبىز.