توقايەۆ اقتوعاي مىس بالقىتۋ زاۋىتىنىڭ قۇرىلىسىن باستاۋ راسىمىنە قاتىستى

پرەزيدەنت سالتاناتتى راسىمدە ءسوز سويلەپ، اباي وبلىسىنداعى اقتوعاي كەن ورنىندا سالىناتىن مىس بالقىتۋ زاۋىتىن تۇتاس ەل ەكونوميكاسىنىڭ وركەندەۋىنە تىڭ سەرپىن بەرەتىن اسا ماڭىزدى جوبانىڭ ءبىرى دەپ اتادى.

- تاۋ-كەن مەتاللۋرگياسى مەملەكەتىمىز ءۇشىن ستراتەگيالىق ماڭىزى زور سالا ەكەنى بەلگىلى. مەن بىلتىر حالىققا جولداۋىمدا وسى ماسەلەگە ارنايى توقتالدىم، ناقتى مىندەتتەردى ايقىندادىم. سوندىقتان جاڭا زاۋىتتىڭ قۇرىلىسىن وسى باعىتتا ىستەلىپ جاتقان بەلسەندى جۇمىستىڭ ناتيجەسى دەپ ايتۋعا بولادى. بارشاڭىزعا ءمالىم، بۇگىندە قازاقستان دامۋدىڭ داڭعىل جولىنا ءتۇسىپ، تاريحي ورلەۋ داۋىرىنە سەنىممەن قادام باستى. ءبىز ءبىرتۇتاس ءارى جاسامپاز جۇرت بولىپ اسا اۋقىمدى رەفورمالاردى تابىستى جۇزەگە اسىرىپ جاتىرمىز. ەڭ باستىسى، جارقىن بولاشاعىمىزعا باعدار بولاتىن كونستيتۋتسيامىزدى قابىلدادىق. كونستيتۋتسيادا ۇلتىمىزدىڭ مىزعىماس قۇندىلىقتارى مەن قاعيداتتارى تولىق كورىنىس تاپتى. ازاماتتاردىڭ ءال-اۋقاتىن ارتتىرۋ ستراتەگيالىق مىندەت رەتىندە ايقىندالدى. وسىنداي وندىرىستىك جوبالار، ەڭ الدىمەن، ەلىمىزدىڭ يگىلىگىن ارتتىرۋدى كوزدەيدى، - دەدى قاسىم-جومارت توقايەۆ.

پرەزيدەنت قازاقستاننىڭ كوپتەگەن پايدالى قازبالارعا يە مەملەكەت رەتىندە وسى تابيعي رەسۋرستاردى ءتيىمدى پايدالانۋعا بارلىق كۇش- جىگەرىن سالىپ جاتقانىنا نازار اۋداردى.

ەلىمىزدە 9,5 مىڭنان استام كەن ورنى بار. قازاقستاندا جىلىنا شامامەن 160 ميلليون توننا كەن وندىرىلەدى. 3,5 ميلليون تونناعا جۋىق مىس كونتسەنتراتى شىعارىلادى.

- جالپى، ەلىمىزدەگى وڭدەۋ ونەركاسىبىنىڭ دامۋ قارقىنى جاقسى دەپ ايتۋعا بولادى. بىلتىر وڭدەۋ سالاسىنداعى جالپى ءونىم كولەمى 60 ميلليارد دوللارعا جەتتى. سوڭعى ءۇش جىلدا ەلىمىزدىڭ بارلىق ايماعىندا 540 يندۋستريالىق جوبا ىسكە قوسىلدى. سونىڭ ارقاسىندا 50 مىڭ تۇراقتى جۇمىس ورنى پايدا بولدى. بۇگىن دە بارىمىز تاعى ءبىر ءوندىرىستىڭ باستالۋىنا كۋا بولىپ وتىرمىز. بۇل - ەل ەكونوميكاسىنا سەرپىن بەرەتىن ماڭىزدى وقيعا. جاڭا كاسىپورىن جىلىنا 300 مىڭ كاتودتى مىس شىعارادى. بۇل ىشكى نارىقتىڭ سۇرانىسىن تولىق قامتاماسىز ەتۋگە جەتەدى. وسى زاۋىت ىسكە قوسىلعان سوڭ قازاقستان جوعارى ساپالى تازارتىلعان مىس وندىرەتىن جەتەكشى ەلدەردىڭ وندىعىنا كىرە الادى. بۇدان بولەك، اتالعان كاسىپورىندا التىن جانە كۇكىرت قىشقىلى وندىرىلمەك. ءبىر سوزبەن، بۇل اۋقىمدى جوبا وتاندىق مەتاللۋرگيا سالاسىنىڭ دامۋىنا قوماقتى ۇلەس قوساتىنى ءسوزسىز، - دەدى مەملەكەت باسشىسى.

پرەزيدەنت كاسىپورىن اكسيونەرلەرىنىڭ الدىندا وتە ماڭىزدى مىندەتتەر تۇرعانىن ايتتى.

- اسىرەسە، جۇمىسشىلاردىڭ زاڭدى الەۋمەتتىك قاجەتتىلىكتەرىن قامتاماسىز ەتۋ قاجەت. «حالىق ۇنىنە قۇلاق اساتىن مەملەكەتتىڭ» باستى ءمانى دە - وسى. ۇكىمەت، جەرگىلىكتى بيلىك وكىلدەرى ەڭبەك ۇجىمدارىمەن تىعىز بايلانىس ورناتىپ، بەلسەندى جۇمىس ىستەۋى كەرەك. بۇل جۇمىس «زاڭ مەن ءتارتىپ» تۇجىرىمداماسىنا سايكەس جۇرگىزىلۋگە ءتيىس، - دەدى مەملەكەت باسشىسى.