توقايەۆ: اقشا ءۇشىن ەل ىشىنە ىرىتكى سالۋدى كوزدەيتىن جىمىسقى ارەكەتتەردەن تۇك شىقپايدى

استانا. KAZINFORM - قازاقستاننىڭ قوعامىندا دا، بيلىگىندە دە ەشقانداي «فوبيا» بۇعان دەيىن بولعان ەمەس، قازىر دە جوق.

بۇل تۋرالى پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىن جاريالاپ جاتقان مەملەكەت باسشىسى قاسىم-جومارت توقايەۆ ايتتى.

«حالقىمىز قاشاندا كەڭ پەيىلىمەن، تولەرانتتىلىعىمەن ەرەكشەلەنگەن. ەلىمىزدىڭ باستى قۇندىلىعى - بىرلىك پەن كەلىسىم ەڭ الدىمەن، وسى قاسيەتتەردىڭ ارقاسىندا ساقتالىپ وتىر. قازاقستاندا تىلىنە، دىنىنە، ۇلتىنا، الەۋمەتتىك جاعدايىنا جانە باسقا دا سەبەپتەرگە بايلانىستى ەشكىمگە ەشقانداي قىسىم جاسالمايدى، جاسالۋى دا مۇمكىن ەمەس. ارينە، مۇنداي جايتتار ارا-تۇرا كەزدەسەدى. ءبىراق، بۇل كوبىنە جەكەلەگەن ادامداردىڭ ساۋاتسىزدىعى مەن جاۋاپسىزدىعىنان بولىپ جاتادى.

قۇقىق قورعاۋ ورگاندارى ءاردايىم زاڭ ارقىلى مۇنداي وقيعالاردىڭ جولىن كەسەدى. بۇعان قوسا، بىزگە بەلگىلى كەيبىر تەرىس پيعىلدى ادامدار، ونىڭ ىشىندە شەتەلدە جۇرگەندەر دە بار، ماسەلەنى ۋشىقتىرۋ ارقىلى قوعامدىق پىكىرگە ىقپال ەتكىسى كەلەدى، ەلىمىزگە ورىنسىز شۇيلىگەدى. قازاقستاننىڭ قوعامىندا دا، بيلىگىندە دە ەشقانداي «فوبيا» بۇعان دەيىن بولعان ەمەس، قازىر دە جوق، بولاشاقتا دا بولمايدى. سوندىقتان اقشا ءۇشىن ەل ىشىنە ىرىتكى سالۋدى كوزدەيتىن مۇنداي جىمىسقى ارەكەتتەردەن تۇك شىقپايتىنى انىق»، - دەدى قاسىم-جومارت توقايەۆ.

پرەزيدەنت ۇيلەسىمدى، ادىلەتتى ءارى تۇراقتى قوعام قۇرۋ ءىسىن جالعاستىرا بەرەتىندىگىمىزدى باسا ايتتى.

«ءبىز - وزىق ويلى ۇلتپىز. سوندىقتان الىستى كوزدەپ، ءتۇرلى ارانداتۋشىلىق ارەكەتتەردەن بيىك تۇرۋىمىز، پاراساتتى ەل ەكەنىمىزدى تانىتۋىمىز جانە تەك زاڭعا ارقا سۇيەۋىمىز كەرەك»، - دەدى مەملەكەت باسشىسى.

اۆتور

مارلان جيەمباي