توعىزقۇمالاق تاقتاسى عارىشقا ۇشىرىلدى

استانا. KAZINFORM - دۇنيەجۇزىلىك كوشپەندىلەر ويىندارى اياسىندا ىشىندە تاستارى بار توعىزقۇمالاقتىڭ تاقتاسى العاش رەت ستراتوسفەرا قاباتىنا شىعىپ، قايتادان جەرگە جەتكىزىلدى.

بۇل تۋرالى ق ر تۋريزم جانە سپورت مينيسترلىگىنىڭ باسپا ءسوز قىزمەتى ءمالىم ەتتى.

9 -قىركۇيەك كۇنى ساعات 09:09- دا 5- دۇنيەجۇزىلىك كوشپەندىلەر ويىندارى اياسىندا توعىزقۇمالاقتان العاشقى ويىندار باستالدى.

قاتىسۋشىلاردىڭ ءبىرىنشى ءجۇرىسى 9 ويىنشىدان تۇراتىن 9 ۇستەلدىك تاقتادا، 9- ۇيادان باستالىپ، ەسەپتەۋ جىلدامدىعىمەن سايىسقا ءتۇستى.

«ەرەكشە ايتا كەتەتىن ماڭىزدى جاڭالىق - توعىزقۇمالاق تاقتاسىنىڭ عارىش كەڭىستىگىنە شىعۋى. رەسەي عارىش اگەنتتىگىمەن اراداعى كەلىسىم نەگىزىندە ىشىندە تاستارى بار تاقتا العاش رەت كوشپەندىلەر ويىندارى اياسىندا ستراتوسفەرا قاباتىنا شىعىپ، قايتادان جەرگە جەتكىزىلدى»، - دەلىنگەن حابارلامادا.

بۇل ءىس-شارا ۇستەل ويىندارىنىڭ جانكۇيەرلەرى ءۇشىن عانا ەمەس، بۇكىل قازاقستان ءۇشىن دە ماڭىزدى جاڭالىق. ويتكەنى توعىزقۇمالاق - عارىشتا بولعان جالعىز ۇستەل ويىنى.

5- دۇنيەجۇزىلىك كوشپەندىلەر ويىندارى اياسىنداعى توعىزقۇمالاق تۋرنيرىندە 41 ەلدەن، ونىڭ ىشىندە كولۋمبيا، بانگلادەش، ۇلى بريتانيا، فرانسيا، گەرمانيا، ا ق ش، قىتاي، لاتۆيا، افريكا جانە اراب ەلدەرىنەن كەلگەن 114 قاتىسۋشى باق سىنايدى.

اۆتور

باقىتگۇل اباي قىزى