توعىزقۇمالاق الدە توعىزات: دەپۋتات ويىننىڭ اتاۋىن وزگەرتۋدى ۇسىندى

استانا. KAZINFORM - ءماجىلىس دەپۋتاتى گۇلدارا نۇرىموۆا جالپى تۇركىلىك توعىزقۇمالاق زياتكەرلىك سپورتىنا «توعىزات» ورتاق اتاۋىن بەرۋدى ۇسىندى.

«مەملەكەت باسشىسى بيىل ەلىمىزدە وتەتىن اۋقىمدى شارانىڭ ءبىرى V دۇنيەجۇزىلىك كوشپەندىلەر ويىنىن جوعارى دەڭگەيدە ساپالى ۇيىمداستىرۋدى تاپسىرعان بولاتىن. وسىعان وراي اتالعان ويىندى وتكىزۋ قارساڭىندا اسا ماڭىزدى ءبىر ماسەلە بار. توعىزقۇمالاق زياتكەرلىك ويىنى تۇركى حالىقتارىنىڭ ورتاق يگىلىگى، تاريحي قۇندىلىعى مەن اقىل- وي مادەنيەتىنىڭ كورسەتكىشى ءارى ورتاق جادىگەرى سانالادى. بۇل ويىن سوڭعى جىلدارى دامۋدىڭ بارىنشا جوعارى ساتىسىنا كوتەرىلگەنمەن، الەمدىك اۋقىمدا بارىنشا ورنىعۋعا كەيبىر كەدەرگىلەر بار. سونىڭ ءبىرى - توعىزقۇمالاق سپورتىنىڭ اتاۋى»، - دەدى تۋريزم جانە سپورت ءمينيسترى ەرمەك مارجىقپايەۆتىڭ اتىنا دەپۋتاتتىق ساۋال جولداعان گۇلدارا نۇرىموۆا.

ونىڭ اتاپ وتۋىنشە، بۇگىندە بۇل ويىننىڭ نەگىزگى ەكى اتاۋى ورنىعىپ وتىر: قازاقشا - توعىزقۇمالاق، قىرعىزشا - توعىزكورگول.

ءىشىنارا تۇرىكشە مانگالا/گەچيۋرمە اتالادى.

قازاقستان تاراپى حالىقارالىق جارىس وتكىزگەندە ويىننىڭ اتى «توعىزقۇمالاق» اتالادى دا، قىرعىزستان جاعى جارىس ۇيىمداستىرعاندا بۇل ويىن «توعىزكورگول» بولىپ شىعا كەلەدى.

وسىلايشا تۇركى حالىقتارىنىڭ ءبىر ويىنى الەمدىك ارەنادا ەكى ءتۇرلى اتالىپ كەلەدى.

«عالىمدار مەن زەرتتەۋشىلەردىڭ پىكىرىنشە، بۇل ويىننىڭ جالپى تۇركىلىك اتاۋى بار، ول - توعىزات. ەتنوگراف گ. زاگرياجسكيدىڭ ەڭبەگىنەن ويىننىڭ اتاۋى XIX عاسىردا «توعىزات» اتالعانى ءمالىم بولىپ وتىر. توعىزقۇمالاقتىڭ بۇرىنعى اتاۋى «توعىزات» ەكەندىگىن بىلدىرەتىن قاراقالپاق جانە قىرعىز ەلدەرىنىڭ ويىندارىنىڭ اتاۋىن دا كەزدەستىرۋگە بولادى. وسى دەرەكتەردى ەسكەرە وتىرىپ، الداعى V- دۇنيەجۇزىلىك كوشپەندىلەر ويىنىنا دەيىن جالپى تۇركىلىك بۇل زياتكەرلىك سپورتتىڭ اتاۋىن ورتاق نۇسقامەن «توعىزات» اتاۋىن قالىپتاستىرۋ شارالارىن قولعا الۋدى ۇسىنامىز. ول ءۇشىن بۇكىل الەمدىك ەتنوسپورت كونفەدەراتسياسى، ق ر ۇلتتىق سپورت قاۋىمداستىعىنىڭ، دۇنيەجۇزىلىك توعىزقۇمالاق فەدەراتسياسىنىڭ قاتىسۋىمەن بىرىككەن شەشىم قابىلداعان دۇرىس بولادى»، - دەدى ءماجىلىس دەپۋتاتى.

اۆتور

مارلان جيەمباي