تۇسكيىز جينايتىن فرانسۋز

استانا. قازاقپارات - فرانسيادان كەلگەن كەلىنشەك تۇسكيىز جيناپ ءجۇر. ال ءسىز شە؟ ءسىزدىڭ ۇيىڭىزدە تۇسكيىز بار ما؟ تەكەمەت، سىرماق شە؟ قازاقتىڭ قولونەر دۇنيەلەرىن ەسكى كوزدەر بىلگەنمەن بۇگىنگى ۇرپاق مۋزەي مەن كورمەلەردەن عانا كورىپ ءجۇر.

وسى ءبىر ەسكى كوز - ەرتەدەن جەتكەن دۇنيەلەردى ءبىراز قازاق ۇمىتا باستاعانمەن، فرانسيا ازاماتى ناتاليا كريۆەتستىڭ ۇيىندە بىرنەشەۋى تۇر. ارينە ونىڭ قىزىن ۇزاتۋعا جيناپ وتىرماعانى بەلگىلى. سونداعى ماقساتى نە؟

ناتاليا كريۆەتس - قازاقستاندا تۋىپ وسكەن. كەيىن فرانسۋز ازاماتىنا تۇرمىسقا شىعىپ، فرانسياعا كوشكەن. تالاي جىل شەتەلدە تۇرىپ، الماتىعا ءبىر كەلگەندە تۇسكيىزگە كوزى تۇسەدى. سودان بەرى كونە دۇنيەلەرگە قىزىعۋشىلىعى ارتىپ، ءتول ونەرىمىزدى زەرتتەپ، جيناقتاپ ءجۇر. قازىر جۇمىس بابىمەن استانادا تۇراتىن ناتاليانىڭ ۇيىندە تۇسكيىزدىڭ 20 ءتۇرى بار.

ناتاليا كريۆەتس، تۇسكيىز كوللەكسيونەرى:

- تۇسكيىزدىڭ ويۋ-ورنەگىنە، بەدەرىنە قاراپ، ەكى ءتۇرلى حاباردى اڭعارۋعا بولادى. العاشقىسى - «قورعان» ءمانى. جاس جۇبايلاردىڭ وتاۋىنا ارنالىپ، ولاردى بالە-جالادان، ءتىل-كوزدەن ساقتاسىن دەگەن ىرىم بولعان. ال ەكىنشى ماعىناسى - قولونەرشى انانىڭ تىلەگى. جاس وتاۋ بەرەكەلى، داۋلەتتى، ءۇبىرلى- ءشۇبىرلى بولسىن دەگەن نيەت.

تەرەڭ ماعىناسى، قايتالانباس ستيليستيكاسى بار تۇسكيىزدەردى ناتاليا ەلوردانىڭ ءبىراز كورمەلەرىندە جۇرتشىلىققا كورسەتكەن. الدا وسى دۇنيەلەردى زەرتتەي تۇسسەم، ونىڭ تاريحىنا قانىعىپ، ودان ءارى شەتەلدىكتەرگە دە تانىستىرسام دەگەن ارمانى بار.

ناتاليا كريۆەتس، تۇسكيىز كوللەكسيونەرى:

- ءدال قازىر قازاقتىڭ تۇسكيىزىن شەتەلدە تانىستىرۋ جاعىن ويلاستىرىپ جاتىرمىن. سەبەبى قازاقستاننىڭ توقىما-تىگىن ونەرى شەتەلدىك اۋديتورياعا ءالى دە تاڭسىق. اسىرەسە فرانسيانىڭ اتاقتى لۋۆر مۇراجايىنداعى كورمەدەن ورىن تاپسا دەيمىن. بۇل جاعىن فرانسيا پرەزيدەنتى ەممانيۋەل ماكروننىڭ قازاقستانعا رەسمي ساپارى كەزىندە پرەزيدەنت توقايەۆ تا ايتىپ قالدى. بۇنى وزىمنەن بۇرىن ءدال وسى تۇسكيىز ونەرىنىڭ مارتەبەسى ءۇشىن قۋانىشتى جاڭالىق دەپ سانار ەدىم.

تۇسكيىز ەرتەدە كەرەگەنى جاۋىپ تۇرسا، كەلە-كەلە ونىڭ ماتادان تىگىلگەن تۇرلەرى دە پايدا بولعان. تەك قازىر مۋزەيدەن بولماسا بۇگىنگىنىڭ ۇيلەرىنەن كورە قويمايسىز. ەسەسىنە ناتاليا كريۆەتس سەكىلدى ونەرگە جاناشىر جاندار جيناپ، كوزىنىڭ قاراشىعىنداي ساقتاپ ءجۇر.

www.24.kz