تۇرىكتەر جىلقى ەتىن جەمەيدى

استانا. قازاقپارات - تۇرىكتەر جىلقى ەتىن جەمەيدى. سيىر، قوي ەتىن جەيدى. ويتكەنى باعزىدا ەل قورعاۋ ءۇشىن ات كەرەك بولعان. اتىس- شابىستا سەرىك بولعان جانۋاردى سويىسقا قيماعان دەيدى تۇرىكتەر.

بۇل - ءبىر. ەكىنشىدەن، بۇل جاقتا كۇن جىلى. ەرتەدە جىلقى ەتى ساقتاۋعا كەلمەيتىن. ساقتاعان كۇننىڭ وزىندە ىستىقتا سورپا ءىشۋدىڭ ءجونى جوق. قانشا دەسەك تە بۇل ەلدە جىلقىنى سويۋعا رۇقسات جوق. زاڭ بۇزعاندارعا قاتاڭ شارا قولدانىلادى. سونىمەن جىلقى جەمەيتىن انادولى جۇرتى باسقا نەنى قورەك ەتەدى؟

تۇركيادا ەت تۇتىنۋ ءداستۇرى مەن مادەنيەتى وتە ماڭىزدى. ءارتۇرلى ەت تۇرلەرى حالىقتىڭ كۇندەلىكتى راتسيونىندا كەزدەسەدى. ەلدىڭ ەت جانە ءسۇت مەكەمەسىنىڭ 2023 -جىلعى ەسەبىنە سايكەس، ءبىر كىسى جىلىنا شامامەن 60 ك گ ەت ونىمدەرىن تۇتىنادى ەكەن. تاۋىق ەتى - تۇركيادا ەڭ كوپ تۇتىنىلاتىن ەت ءتۇرى. سەبەبى ول ءدامدى ءارى سالىستىرمالى تۇردە ارزان. تاپ قازىر سيىر جانە قوي ەتىنىڭ باعاسى 6000 مەن 15000 ارالىعىندا ساۋدالانىپ جاتىر.

رامازان كاراات، قاساپشى:

- باسقا دۇكەندەرمەن سالىستىرعاندا ەت باعاسى بىزدە تومەن. ادامدار بىزدەن كوبىنە تاۋىق پەن قيما الادى. تاۋىق قاناتىنىڭ باعاسى 175 ليرادان باستالادى. مال ەتىنىڭ ەڭ ارزانى 435 ليرا.

سيىر ەتى تۇركياداعى ماڭىزدى ەت ءتۇرى، ءبىراق ونىڭ تۇتىنۋى تاۋىق ەتىنە قاراعاندا تومەن. ءىرى قارا ەتى كوبىنە قىمبات بولعاندىقتان، كوپشىلىك ونى تەك ارنايى جاعدايلاردا نەمەسە مەيرامداردا تۇتىنادى. سيىر ەتىن تاعامداردا، اسىرەسە كەباب، شيش جانە ستەيك سياقتى تاعامداردا ءجيى قولدانادى.

ەرجۋمەنت ياعمۇر، تۇرعىن:

- ەتتىڭ باعاسى كەيىنگى جىلدارى ينفلياتسياعا بايلانىستى قاتتى قىمباتتادى. سول سەبەپتى تاۋىق ەتىنە اۋىستىق. ءىرى جانە ۇساق مال ەتىن قوناق كەلگەندە، ايرىقشا كۇندەردە الۋعا تىرىسامىن.

قوي ەتى اسىرەسە تۇركيانىڭ وڭتۇستىك جانە ورتالىق ايماقتارىندا تانىمال. بىزدەگى سەكىلدى سوعىم سويۋ دەگەن سيرەك. تەك قۇربان شالۋ كەزىندە مال كوپ سويىلادى. ونىڭ ءبىرازى وزدەرىنە قالۋى ىقتيمال. ەكىنشىسى سەبەپ، كۇن ىستىق بولعان سوڭ بۇل جاقتا ەت جەۋ دە قيىن. اقتەڭىز بەن ەگەيدە ءشوپ شالام قوسىلعان تاعامدار باسىم.

24.kz