تۇرىكمەنستانعا تۇركپا قۇرامىنا كىرۋ ۇسىنىلدى
استانا. KAZINFORM - تۇركيا تۇرىكمەنستاندى تۇركى مەملەكەتتەرىنىڭ پارلامەنتتىك اسسامبلەياسىنا مۇشەلىككە شاقىردى.
تۇركپا قاتارىنا قوسىلۋ ۇسىنىسى تۇرىكمەنستان پارلامەنتتىك دەلەگاتسياسىنىڭ انكاراعا ساپارى بارىسىندا ايتىلدى، ونى مەدجليس ءتورايىمى دۋنياگوزەل گۋلمانوۆا باسقاردى.
تاراپتار پارلامەنتارالىق ىنتىماقتاستىق مەملەكەتارالىق ىنتىماقتاستىقتى ودان ءارى نىعايتۋعا سەپتىگىن تيگىزەتىنىنە، ال ەكىجاقتى نەگىزدە قۇرىلعان پارلامەنتتىك دوستىق توپتارى زاڭ شىعارۋ قىزمەتى سالاسىندا تاجىريبە الماسۋعا جانە پارلامەنتتىك ديپلوماتيانى دامىتۋعا ىقپال ەتەتىنىنە سەنىم ءبىلدىردى.
تۇركپا - قۇرامىنا قازاقستان، تۇركيا، ازەربايجان جانە قىرعىزستان كىرەتىن حالىقارالىق ۇيىم.
بۇعان دەيىن ازەربايجان استاناسىندا تۇركى مەملەكەتتەرى پارلامەنتتىك اسسامبلەياسىنىڭ 13- جالپى وتىرىسى مەن اسسامبلەيا كەڭەسىنىڭ وتىرىسى وتكەنى حابارلانعان بولاتىن.
ءىس-شارالارعا پارلامەنت ءماجىلىسىنىڭ ءتوراعاسى ەرلان قوشانوۆ باستاعان دەلەگاتسيا قاتىستى.
ەسكە سالساق قازاقستان مەن تۇرىكمەنستان اراسىندا تاۋار اينالىمى 1 ميلليارد دوللارعا دەيىن ارتاتىنى تۋرالى جازعان ەدىك.
اۆتور
زارينا تۋعانبايەۆا
