تەرى مەن ءجۇندى وڭدەۋ سالاسىندا سۋبسيديالار ەنگىزىلمەك

рынок скота мал базары коровы сиырлар
Фото: Максат Шагырбаев/ Kazinform

استانا. KAZINFORM - ەل وڭىرلەرىندە مال تەرىسى مەن ءجۇنىن دايىندايتىن ورتالىقتار قۇرىلادى. بۇل تۋرالى پارلامەنت ماجىلىسىندە مال شارۋاشىلىعى ونىمدەرىن تەرەڭ وڭدەۋ تاقىرىبىنا ارنالعان ۇكىمەت ساعاتىندا اۋىل شارۋاشىلىعى ءمينيسترى ايداربەك ساپاروۆ ايتتى.

«تەرىنى وڭدەۋدەگى پروبلەما شيكىزاتتىڭ تومەن ساپاسىنا قاتىستى. تەرىنىڭ جىلدىق ءوندىرىس كولەمى 3,5 ميلليون بولسا، ونىڭ شامامەن 600 مىڭى قايتا وڭدەۋگە جانە ەكسپورتقا جىبەرىلەدى. مالدىڭ كوپ بولىگىن سويۋ كەزىندە تەرىلەرى ءبۇلىنىپ، بىلعارى كاسىپورىندارىنىڭ تالاپتارىنا سايكەس كەلمەيدى. ناتيجەسىندە، 2023 -جىلى وندىرىلگەن تەرىنىڭ 15 پايىزى قايتا وڭدەۋگە جانە ەكسپورتتاۋعا جۇمسالدى»، - دەدى ا. ساپاروۆ.

ونىڭ ايتۋىنشا، بۇل ماسەلەنى شەشۋ ءۇشىن تەرىلەر مەن ءجۇننىڭ ساپاسى ماڭىزدى ەمەس وندىرىستەردى دامىتۋ كەرەك. ماسەلەن، جەلاتين مەن جەم-ءشوپ قوسپالارىن ءوندىرۋ نەمەسە قۇرىلىسقا ارنالعان جىلۋ ۇستايتىن ماتەريالدار جاساۋعا نازار اۋدارۋ قاجەت.

«كەشەندى جوسپاردا ءجۇن مەن تەرىنى وڭدەۋدى دامىتۋعا ەرەكشە ورىن بولىنگەن. وسى جەردە ايتا كەتەتىن جايت، بۇل سالانى دامىتۋ فۋنكسياسى ونەركاسىپ جانە قۇرىلىس مينيسترلىگىنەن 2022 -جىلدىڭ اياعىنان باستاپ قانا اۋىل شارۋاشىلىعى مينيسترلىگىنە بەرىلگەن.

سوندىقتان 2023 -جىلدان باستاپ ينۆەستيتسيالىق سۋبسيديالاۋ ەرەجەسىندە ءجۇن جانە تەرى ءوندىرۋ مەن وڭدەۋ جوباسىن ىسكە اسىرۋ قۇنىنىڭ 25 پايىزىن وتەۋ كوزدەلگەن. تەرى وڭدەۋ بويىنشا سولتۇستىك قازاقستان جانە الماتى وبلىستارىندا جالپى قۋاتى 6,8 مىڭ توننا ازىقتىق قوسپالاردى وندىرەتىن 2 جوبا ىسكە اسىرىلدى. بۇل - قۋاتتىلىعى 4,8 مىڭ توننا س ك «پروتەين» جانە قۋاتتىلىعى 2 مىڭ توننالىق «باتۋ اگرو» جاۋاپكەرشىلىگى شەكتەۋلى سەرىكتەستىگى. قازىرگى كەزدە الماتى قالاسىندا قۋاتى جىلىنا 7 مىڭ توننا بولاتىن جەلاتين وندىرەتىن «Iskefe Holding» جاۋاپكەرشىلىگى شەكتەۋلى سەرىكتەستىگىنىڭ ينۆەستيتسيالىق جوباسى پىسىقتالىپ جاتىر»، - دەدى ۆەدومستۆو باسشىسى.

ونىڭ سوزىنە قاراعاندا، وتاندىق وڭدەۋ كاسىپورىندارىن ىنتالاندىرۋ ءۇشىن تەرى مەن ءجۇندى وڭدەۋگە تاپسىرعان كەزدە، فەرمەرلەردى سۋبسيديالاۋ جوسپارلانعان. ونەركاسىپتىك كولەمدى قالىپتاستىرۋ ماقساتىندا ەلدىڭ بارلىق وڭىرىندە مال تەرىسى مەن ءجۇنىن دايىندايتىن ورتالىقتاردى قۇرۋ ەسكەرىلگەن.

ءوز كەزەگىندە ءماجىلىس دەپۋتاتى سەرىك ەگىزبايەۆ تەرى مەن ءجۇندى وڭدەۋدىڭ قولدانىستاعى تەحنولوگيالارى ەسكىرگەنىن، شيكىزاتتى دايىنداۋ، تاسىمالداۋ جانە ساقتاۋدىڭ جۇيەسى جوق ەكەنىن ايتتى.

«سونىڭ سالدارىنان بىلتىر جالپى وندىرىلگەن 42 مىڭ توننا ءجۇننىڭ 34 مىڭ تونناسى نەمەسە 81 پايىزى وڭدەلمەي، ورتەنگەن نەمەسە قوقىسقا تاستالعان. مال تەرىسى بويىنشا جاعداي وسىلاي، ياعني ءىرى قارانىڭ 3,5 ميلليون تەرىسىنىڭ 208 مىڭى نەمەسە 6 پايىزى عانا وڭدەلسە، قالعانى قوقىستا جاتىر»، - دەدى دەپۋتات.

اۆتور

رۋسلان عابباسوۆ

سوڭعى جاڭالىقتار