پەتروپاۆلدا ەسكەرتكىش ۇستىنە ءمىنىپ، سەلفي جاساعان شەتەلدىك قاماۋعا الىندى
پەتروپاۆل. KAZINFORM - پەتروپاۆلدا «اباي مەن پۋشكين» ەسكەرتكىشىنە ءمىنىپ، سۋرەتكە تۇسكەن شەتەلدىك بەس تاۋلىككە قاماۋعا الىندى.
وقيعا 1-قاڭتار كۇنى بولعان. سولتۇستىك قازاقستان وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، تاۋەلسىزدىك ستەللاسىنىڭ ماڭىنداعى مۇز قالاشىعىندا سەرۋەندەپ جۇرگەن قالا تۇرعىندارى جىگىتتەردىڭ ورەسكەل ارەكەتىن بايقاعان. جاستار جاقىن ماڭداعى «اباي مەن پۋشكين» ەسكەرتكىشىنە ءمىنىپ سۋرەتكە تۇسكەن. بەيادەپ سويلەپ، قوعامدىق ءتارتىپتى بۇزعان.
تۇرعىندار سول ماڭدا كەزەكشىلىكتە جۇرگەن پوليتسيانىڭ جاياۋ جاساعىنا جۇگىنىپ، جەدەل باسقارۋ ورتالىعىنداعى بەينەباقىلاۋ ينسپەكتورلارىنىڭ كومەگىمەن قۇقىق بۇزۋشىلاردى ۇستادى.
جىگىتتەرگە قوعامدىق ورىندا ماس كۇيدە بولعانى ءۇشىن حاتتامالار تولتىرىلدى، ءبىراز ۋاقىت بۇرىن كورشى ەلدەردىڭ بىرىنەن پەتروپاۆلعا كەلگەن جاستاردىڭ ۇشەۋىنىڭ دە قازاقستان اۋماعىندا بولۋ مەرزىمى اياقتالعانى انىقتالدى. ولار بۇل زاڭ بۇزۋشىلىقتارى ءۇشىن دە اكىمشىلىك جاۋاپكەرشىلىككە تارتىلدى.
ال پەتروپاۆلدىڭ اكىمشىلىك قۇقىق بۇزۋشىلىق ىستەر جونىندەگى مامانداندىرىلعان سوتى ەسكەرتكىش ۇستىندە سەلفيگە تۇسكەن شەتەلدىكتى بەس تاۋلىككە اكىمشىلىك قاماۋعا الۋ تۇرىندەگى جاۋاپكەرشىلىككە تارتتى.
اۆتور
اقەركە داۋرەنبەك قىزى
