پەتروپاۆلدا ەر ادامنىڭ ۇيالى تەلەفونى ورتەنىپ، ءوزى اۋىر حالدە اۋرۋحاناعا ءتۇستى

پەتروپاۆل. KAZINFORM - پەتروپاۆلدا قۋاتتالىپ تۇرعان تەلەفون ءورتتىڭ شىعۋىنا سەبەپ بولدى. سالدارىنان 56 جاستاعى ەر ادام اۋرۋحاناعا ءتۇستى.

سولتۇستىك قازاقستان وبلىسى توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنشە، وقيعا بۇگىن تاڭەرتەڭ بولعان. پەتروپاۆلداعى ءۇش قاباتتى تۇرعىن ءۇيدىڭ ءبىرىنشى قاباتىنداعى پاتەرلەردىڭ بىرىندە ءورت شىققان.

«ءورت 5 شارشى مەتر اۋماقتا بولىپ، جيھاز جاندى. ءورت سوندىرۋشىلەر ونى 8 مينۋت ىشىندە تولىق ءسوندىردى. پاتەردە بولعان 1968 -جىلعى ەر ادامعا ءيىس ءتيىپ، ۋلانعان ەكەن. ەمدەۋ مەكەمەسىنە جەتكىزىلدى»، - دەلىنگەن ۆەدومستۆونىڭ باسپا ءسوز حابارلاماسىندا.

مامانداردىڭ ايتۋىنشا، ءورتتىڭ شىعۋىنا ۇيالى تەلەفون قۋاتتاعىشى سەبەپ بولۋى مۇمكىن.

س ق و دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنشە، زارداپ شەككەن ەر ادام قازىر پەتروپاۆل قالالىق كوپبەيىندى اۋرۋحانادا ەم الىپ جاتىر. جەدەل جاردەم كولىگىمەن جەتكىزىلگەن قالا تۇرعىنىنىڭ جاعدايى وتە اۋىر.

جانساقتاۋ بولىمىندە كومادا جاتىر، وكپەنى جاساندى جەلدەتۋ اپپاراتىنا قوسىلعان.

بۇعان دەيىن قاراعاندى- بالقاش تاس جولىندا ەكى ادامنىڭ جول-كولىك اپاتىنان قازا تاپقانىن جازعان ەدىك.

اۆتور
اقەركە داۋرەنبەك قىزى