پەتروپاۆلدا قارۋمەن ادام قورقىتىپ، اقشا بوپسالاعان ۇشەۋ 4,8 جىلعا سوتتالدى
پەتروپاۆل. KAZINFORM - قىلمىسكەرلەر 42 جاستاعى قالا تۇرعىنىنا وق اتىپ، 1 ميلليون تەڭگە اقشا تالاپ ەتكەن.
سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، جابىرلەنۋشىنى قىلمىسكەرلەردىڭ ءبىرى تاڭداعان. ويتكەنى ءبىر كەزدەرى ولاردىڭ ارالارىندا داۋ- جانجال بولعان. ولار جابىرلەنۋشى ەر ادامنان اقشانى ەڭ ءبىرىنشى رەت ناۋرىز ايىندا سوققىنىڭ استىنا الىپ تالاپ ەتكەن. كەيىن ءساۋىر ايىندا ونىڭ اۆتوكولىگىن شينا جيناقتاۋ پۋنكتىندە بايقاپ قالىپ، تاعى دا اقشا تالاپ ەتكەن. ەر ادام قاشىپ قۇتىلماق بولعاندا، ولار سوڭىنان قۋىپ، قىلمىسكەرلەردىڭ ءبىرى سوڭىنان گازدى تاپانشادان بىرنەشە رەت وق اتقان.
ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى قىلمىسكەرلەردى وتكەن جىلدىڭ كوكتەمىندە، تابيعي اپاتقا بايلانىستى وڭىردە توتەنشە جاعداي جاريالانعان كەزەڭدە ۇستادى. پەتروپاۆلدىقتىڭ ەكەۋى 29 جاستا بولسا، 31 جاستاعىسى بۇرىن بۇزاقىلىق پەن توناۋ ءۇشىن ءىستى بولعان ەكەن.
سوت ۇكىمىمەن ۇشەۋى دە قارۋ قولدانۋ ارقىلى قورقىتۋ جانە بۇزاقىلىق جاساعانى ءۇشىن كىنالى دەپ تانىلدى. سوت ولاردىڭ ءارقايسىسىن 4 جىل 8 ايعا باس بوستاندىعىنان ايىردى.
سوت ۇكىمى 8-قاڭتار كۇنى زاڭدى كۇشىنە ەندى.
