پەتروپاۆلدا فۋتبول ويناپ جۇرگەن بوزبالا الاڭدا قۇلاپ، اۋرۋحانادا تىلگە كەلمەستەن كوز جۇمدى
پەتروپاۆلدا فۋتبول ويناپ جاتتىعىپ جۇرگەن بوزبالا قازا تاپتى. كەنەتتەن جۇرەگى توقتاعان 18 جاستاعى جىگىتتى دارىگەرلەر قۇتقارا المادى، - دەپ حابارلايدى Kazinform.

وقيعا كەشە كەشقۇرىم بولعان. WhatsApp-تا تاراعان ۆيدەودا جىگىتتىڭ دوپتى قۋالاپ جۇرگەنىن كورۋگە بولادى. ءبىر ساتتە بوزبالا قۇلاپ ءتۇستى.
كۋاگەرلەردىڭ ايتۋىنشا، وقيعا ورنىنا كەلگەن جەدەل جاردەم قىزمەتى جۇرەگى توقتاپ قالعان جىگىتكە رەانيماتسيالىق كومەك كورسەتكەن. الايدا، بالا وبلىستىق كوپبەيىندى بالالار اۋرۋحاناسىندا تىلگە كەلمەستەن قايتىس بولدى.
سولتۇستىك قازاقستان وبلىستىق دەنساۋلىق ساقتاۋ باسقارماسى اقپارات بەرۋدەن باس تارتتى.
باسپاءسوز قىزمەتىنىڭ مالىمەتىنشە، سوت- مەديتسينالىق ساراپتاما جۇرگىزىلەدى، تەرگەۋ بولادى. وعان دەيىن جاريالاۋعا بولمايدى.
س ق و دەنە شىنىقتىرۋ جانە سپورت باسقارماسى باسپا ءسوز قىزمەتىنىڭ مالىمەتىنشە، قايتىس بولعان راۋان مۇحتاروۆ 16 -قازان كۇنى ساعات 18.00-دەن باستاپ «قاراساي» ستاديونىنىڭ قوسىمشا فۋتبول الاڭىندا جاتتىققان.
بوزبالا 2005 -جىلى تۋعان، سولتۇستىك قازاقستان كاسىبي- پەداگوگيكالىق كوللەدجىندە «دەنە شىنىقتىرۋ جانە سپورت» ماماندىعى بويىنشا 2 كۋرستا جاقسى وقىعان.
11 جاسىنان بوكسپەن اينالىسقان، جاسوسپىرىمدەر اراسىندا بوكستان وبلىس چەمپيونى، كادەتتەر بويىنشا حالىقارالىق تۋرنيردىڭ جەڭىمپازى. بيىل شىلدە ايىنان باستاپ فۋتبولعا اۋىسىپ، « قىزىل- جار» فۋتبول ورتالىعىندا جاتتىعا باستاعان. دەنساۋلىعىنا ەشقاشان شاعىمدانباعان.
اۆتور
اقەركە داۋرەنبەك قىزى