پەتروپاۆلدا دارىگەردى ۇرىپ، كەيىن ەر ادامدى پىشاقتاعان جاس ءوسپىرىم سوتتالدى

پەتروپاۆل. KAZINFORM - سولتۇستىك قازاقستان وبلىسىنىڭ كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتى ۇرلىق، بۇزاقىلىق جانە بيلىك وكىلىنە كۇش قولداندى دەگەن ايىپ تاعىلعان گريگوري اگايەۆ پەن ونىڭ ءتورت سىبايلاسىنا ۇكىم شىعاردى. نەگىزگى ايىپتالۋشى اگايەۆ وتكەن جىلدىڭ 23-قازانىندا وبلىستىق بالالار اۋرۋحاناسىنا باسا كوكتەپ كىرىپ، دارىگەرلەرگە شابۋىل جاساعان.

ول مەديتسينا قىزمەتكەرلەرىن تاپانشامەن قورقىتقان. كەيىن ونىڭ ويىنشىق ەكەنى انىقتالدى.

2023 -جىلدىڭ 4-قاراشاسىندا اگايەۆ سىبايلاسى تەمىرلان تۇنقاتاروۆپەن بىرگە پەتروپاۆل قالاسىنداعى نازاربايەۆ كوشەسى، 211-مەكەنجايىندا كەتىپ بارا جاتقان ادامدى ەش سەبەپسىز سوققىعا جىعىپ، دەنساۋلىعىنا زيان كەلتىرگەن.

«2023 -جىلدىڭ 21-قاراشاسىندا سەيفۋللين كوشەسىندەگى №60-ءۇيدىڭ قاسىندا اگايەۆ قوعامدىق ءتارتىپتى بۇزىپ، دارەت سىندىرعان. ونى كورگەن قالا تۇرعىنى ەسكەرتۋ جاسايدى. جاس ءوسپىرىم ونىڭ جامباسى مەن بىلەگىنە پىشاق سۇعىپ، دەنساۋلىعىنا زيان كەلتىرگەن. سونىمەن قاتار، 2023 -جىلدىڭ 27-قاراشاسىندا اگايەۆ گوركي كوشەسى، 209 ا مەكەنجايىندا ورنالاسقان سوت عيماراتىنان №66-مەكەمە - تەرگەۋ يزولياتورىنا بارماي قاشپاقشى بولعان. ول وبلىستىق پوليتسيا دەپارتامەنتى ۆزۆودىنىڭ قىزمەتكەرىنىڭ بەتىنەن باسىمەن ۇرعان»، - دەلىنگەن وبلىستىق سوتتىڭ باسپا ءسوز حابارلاماسىندا.

قالعان ايىپتالۋشىلار: تەمىرلان ءتۇنقاتاروۆ ۇرلىق جانە بۇزاقىلىق، تيمۋر مەلنيكوۆ، الەكسەي رۋدنيسكي جانە نيكولاي گۋدەنكوۆ ۇرلىق بابى بويىنشا سوتتالدى.

2023 -جىلدىڭ قازانى مەن قاراشا ايلارىندا اگايەۆ، رۋدنيسكي، گۋدەنكوۆ جانە مەلنيكوۆ بىرنەشە ۇرلىق جاساعان. ولار «Magnum Cash Carry» ،«FamilyMarket» ،«Sportmaster» جانە «HipShop» دۇكەندەرىنىڭ تاۋارلارىن قولدى قىلعان.

سوت ۇكىمىمەن گريگوري اگايەۆ ءۇش جىلعا باس بوستاندىعىنان ايىرىلدى. جاس ءوسپىرىم جازاسىن قاۋىپسىزدىگى ورتاشا دەڭگەيدەگى كامەلەتكە تولماعان قىلمىسكەرلەرگە ارنالعان مەكەمەدە وتەيدى. تەمىرلان ءتۇنقاتاروۆتىڭ ءۇش جىلعا باس بوستاندىعى شەكتەلدى، پروباتسيالىق باقىلاۋ جۇرگىزىلمەك.

تيمۋر مەلنيكوۆ ەكى جىلعا، نيكولاي گۋدەنكوۆ ءبىر جىل ءتورت ايعا، الەكسەي رۋدنيسكي ءبىر جىلعا شارتتى تۇردە باس بوستاندىعىنان ايىرىلدى.

سونىمەن قاتار، سوتتالۋشىلار «Magnum Cash Carry» ج ش س جانە «سپورتماستەركازاحستان» ج ش س كەلتىرگەن ماتەريالدىق شىعىندى وتەيدى.

ۇكىم زاڭدى كۇشىنە ەنگەن جوق.

اۆتور

اقەركە داۋرەنبەك قىزى