پەتروپاۆلدا ۋربانيستيكا دەپارتامەنتى قۇرىلدى: ول نەمەن اينالىسادى
پەتروپاۆل. KAZINFORM - پەتروپاۆلدا قالانىڭ ساۋلەتى مەن كەلبەتىنە جاۋاپ بەرەتىن جاڭا قۇرىلىم پايدا بولدى.
ۋربانيستيكا دەپارتامەنتى تامىز ايىندا «سولتۇستىك» الەۋمەتتىك-كاسىپكەرلىك كورپوراتسياسىنىڭ قۇرامىندا جۇمىسىن باستاپ كەتتى. جاڭا قۇرىلىمنىڭ ديرەكتورى بولىپ رينات جۋاسبايەۆ تاعايىندالدى. شتاتتا بەس ادام ەڭبەك ەتەدى.
دەپارتامەنتكە وڭىردەگى ۋربانيستيكا ماسەلەلەرىمەن جۇيەلى تۇردە جۇمىس ىستەۋ مىندەتتەلگەن، ياعني پەتروپاۆلدىڭ عانا ەمەس، وبلىستاعى تايىنشا، سەرگەيەۆكا، مامليۋتكا جانە بۋلايەۆو قالالارىنىڭ دا ساۋلەتتىك كەلبەتىن قالىپتاستىرىپ، ونى زاماناۋي تالاپتارعا سايكەستەندىرۋى قاجەت.
قازىر دەپارتامەنت پەتروپاۆلدىڭ بيىل بەكىتىلگەن ديزاين-كودىمەن جۇمىستى باستاپ كەتتى.
- ديزاين-كود قالاداعى عيماراتتاردىڭ قاسبەتى، ماڭدايشا- جازۋلار، ءتۇس ۇيلەسىمى، كوگالداندىرۋ، جارىقتاندىرۋ، كوشە جيھازى مەن اباتتاندىرۋ ەلەمەنتتەرىنە قويىلاتىن ورتاق تالاپتاردى بەلگىلەيدى. وسىنىڭ ءبارىنىڭ ورتاق ءبىر قاعيداعا ساي قالىپتاسۋى. بۇل اسىرەسە ورتالىق كوشەلەردەگى عيماراتتاردىڭ سىرتقى كەلبەتى، جارنامالار مەن ماڭدايشالاردىڭ ورنالاسۋى، كوشەلەردىڭ جارىقتاندىرىلۋى مەن كوگالداندىرىلۋىنا قاتىستى، - دەيدى رينات جۋاسبايەۆ.
ماماننىڭ ايتۋىنشا، بۇگىندە پەتروپاۆلدىڭ ديزاين-كودىن ءىس جۇزىندە ەنگىزۋ جولدارى پىسىقتالىپ جاتىر. ياعني، نورماتيۆتىك- قۇقىقتىق قۇجاتتاردا مىندەتتى تالاپ رەتىندە بەكىتۋ، كاسىپكەرلەرگە بەيىمدەلۋ كەزەڭىن بەرۋ جانە تالاپقا ساي كەلمەيتىن نىساندارعا قاتىستى شارالار قولدانۋ. بۇل قالا قىزمەتتەرى مەن بيزنەس اراسىنداعى جۇمىستى ءبىر جۇيەگە كەلتىرۋگە باعىتتالعان.
جاقىندا ۋربانيستيكا دەپارتامەنتى ساراپتامالىق، ادىستەمەلىك جانە جوبالىق قولداۋ كورسەتۋ ءۇشىن استاناداعى ۋربانيستيكا ورتالىعىنىڭ بەيىندى ساراپشىلارىن تارتۋ جونىندە الدىن الا كەلىسسوزدەر جۇرگىزدى.
- وڭىردە تۇرعىن ءۇي قورىن جاڭارتۋ ماسەلەسى دە قاراستىرىلىپ جاتىر. وبلىستىق ءماسليحاتتىڭ سەسسياسىندا سولتۇستىك قازاقستان وبلىسىنىڭ 2026- 2029 -جىلدارعا ارنالعان تۇرعىن ءۇيدى رەنوۆاتسيالاۋ باعدارلاماسى بەكىتىلدى. بۇل قۇجات اپاتتى جاعدايدا تۇرعان باسپانالاردى بۇزىپ، تۇرعىن ءۇي يەلەرىن جاڭا پاتەرمەن قامتاماسىز ەتۋدى كوزدەيدى. قازىرگى ۋاقىتتا مالىمەتتەر ناقتىلانىپ جاتىر، - دەيدى دەپارتامەنت باسشىسى.
بۇعان دەيىن پرەزيدەنت استانالىق ۋربانيستيكا ورتالىعىنىڭ تاجىريبەسىن وڭىرلەرگە تاراتۋ قاجەتتىگىن ايتقانىن جازعان ەدىك.
