پەتروپاۆلدا كوللەدج جاتاقحاناسىندا 8 ادامنان تەمىرەتكى انىقتالدى
پەتروپاۆل. KAZINFORM - پەتروپاۆلداعى ماعجان جۇمابايەۆ اتىنداعى جوعارى كوللەدجدىڭ جاتاقحاناسىندا تۇراتىن سەگىز ادام «دەنە تەرىسىنىڭ دەرماتوفيتياسى» باستاپقى دياگنوزىمەن اۋرۋحاناعا جاتقىزىلدى.
حالىق اراسىندا تەمىرەتكى دەپ اتالىپ كەتكەن دەرماتوفيتيا جۇقپالى اۋرۋعا جاتادى.
پەتروپاۆل قالالىق سانيتاريالىق- ەپيدەميولوگيالىق باقىلاۋ باسقارماسىنىڭ ەپيدەميولوگيالىق باقىلاۋ ءبولىمىنىڭ باسشىسى انارا كۋرگۋنبايەۆانىڭ ايتۋىنشا، 25-قىركۇيەكتە كوپبەيىندى وبلىستىق اۋرۋحانادان سەگىز ادامعا «دەنە تەرىسىنىڭ دەرماتوفيتياسى» باستاپقى دياگنوزى قويىلعاندىعى تۋرالى شۇعىل حابارلاما تۇسكەن.
قازىرگى ۋاقىتتا ينفەكتسيانىڭ كوزىن جانە ىقتيمال بەرىلۋ جولدارىن انىقتاۋ ماقساتىندا كوللەدج بەن ونىڭ جاتاقحاناسىندا ەپيدەميولوگيالىق تەرگەپ- تەكسەرۋ جۇرگىزىلىپ جاتىر.
- تەكسەرۋ بارىسىندا ناۋقاستاردىڭ جاتاقحانانىڭ ءبىر قاباتىندا تۇراتىنى، بولمەلەرىنىڭ ءبىر-بىرىنە جاقىن ورنالاسقانى جانە ولاردىڭ اراسىندا تىعىز تۇرمىستىق بايلانىس بولعانى انىقتالدى. دياگنوزدى ناقتىلاۋ ءۇشىن تەرى-ۆەنەرولوگيالىق ديسپانسەردە الىنعان پاتولوگيالىق ماتەريالعا زەرتحانالىق زەرتتەۋ جۇرگىزىلىپ جاتىر، - دەيدى انارا كۋرگۋنبايەۆا.
قازىرگى ۋاقىتتا بارلىق ناۋقاس اۋرۋحاناعا جاتقىزىلعان. سونىمەن قاتار ولاردىڭ تۇرعىلىقتى جەرى مەن وقۋ ورنىندا قورىتىندى دەزينفەكتسيا جۇرگىزىلگەن. ماماننىڭ ايتۋىنشا، كوللەدج بەن جاتاقحانادا ەپيدەمياعا قارسى جانە پروفيلاكتيكالىق ءىس-شارالار وتكىزۋ تۋرالى قاۋلى شىعارىلدى.
- ناۋقاستارعا ەمدەۋ كۋرسى اياقتالعاننان كەيىن ءبىر اي بويى ديناميكالىق مەديتسينالىق باقىلاۋدا بولادى. وسى كەزەڭدە ولاردان باقىلاۋ ءۇشىن تاعى ەكى رەت زەرتحانالىق تالداۋ الىنادى، - دەيدى انارا كۋرگۋنبايەۆا.
سانيتاريالىق-ەپيدەميولوگيالىق باقىلاۋ باسقارماسىنىڭ مالىمەتىنشە، قازىر ينفەكسيانىڭ ناقتى كوزى انىقتالعان جوق. ەپيدەميولوگيالىق تەرگەپ-تەكسەرۋ جالعاسىپ جاتىر.
