تۇرمەنى تەسىپ شىعاتىن قىلمىسكەر كوبەيگەن

استانا. قازاقپارات - ەلىمىزدە تاۋەلسىزدىك العالى جازاسىن وتەۋشىلەرگە ارنالعان بىردە-ءبىر جاڭا مەكەمە سالىنباعان. سالدارىنان تۇرمەدە جاسالاتىن قىلمىس سانى كوبەيگەن.

سوتتالعان ازاماتتار قۇلاۋ الدىندا تۇرعان عيماراتتاردىڭ قابىرعاسىن تەسىپ، ايەلدەر جاققا وتۋدە. ودان بولەك، 2021 -جىلى ماڭعىستاۋ وبلىسىنداعى قاتاڭ رەجيمدەگى كولونيادا جۇزدەن استام جازاسىن وتەۋشى تەرىس ءدىني اعىمداردى كەڭىنەن ناسيحاتتاپ، كولونيانى قۇلاتقان. ءۇش ادام ءۇيىندى استىندا اجال قۇشتى. «وسىنداي دەرەك كوپ»، - دەيدى ءماجىلىس دەپۋتاتى ابزال قۇسپان.

ەلىمىزدە قىلمىستىق اتقارۋ جۇيەسىنە قاراستى 1500 دەي عيمارات بولسا، سونىڭ 60 پايىزى قاناعاتتانارلىقسىز. ال 20 پايىزى، ياعني 338 عيمارات اپاتتىق جاعدايدا ەكەن.

ابزال قۇسپان، ق ر پارلامەنتى ءماجىلىسىنىڭ دەپۋتاتى:

- ءبىراق تۇرمەلەردىڭ ەڭ ەسكىسى ول ەمەس. وسكەمەن قالاسىنداعى تەرگەۋ يزولياتورى 18-عاسىردان بەرى قولدانىستا. اسىلىندە بۇلار تۇرمە ەمەس، مۋزەي قىزمەتىن اتقاراتىن عيماراتتار. ورال قالاسىندا بۇدان 11 جىل بۇرىن مەملەكەتتەن قارجى ءبولىنىپ، 23 گەكتار اۋماقتا جاڭا تەرگەۋ يزولياتوردىڭ قۇرىلىسى باستالعان بولاتىن. الايدا ورتا جولدان، جەرگىلىكتى پروكۋراتۋرا قۇرىلىس اياقتالماعان وبەكتىدەن 1,5 ميللياردقا شىعىن تاۋىپ، كومپانيانىڭ اتقارۋشى ديرەكتورىن سوتتاپ، ناتيجەسىندە قۇرىلىس قاڭتارىلىپ قالدى.

www.24.kz