تۇركىستاندىق تاعى ءبىر تۇلەك شەتەلدىڭ 45 جوعارى وقۋ ورنىنان شاقىرتۋ الدى
تۇركىستان. KAZINFORM - تۇركىستاندىق تۇلەك دامير ايۋپوۆ شەتەلدىڭ 45 جوعارى وقۋ ورنىنان شاقىرتۋ الدى. ولاردىڭ قاتارىندا ا ق ش، شۆەيتساريا، گەرمانيا، يسپانيا، مالايزيا، شوتلانديا سەكىلدى ەلدەر بار.
تۇركىستان قالاسىنداعى № 15 جالپى ورتا مەكتەپتىڭ تۇلەگى دامير ايۋپوۆ ۇلتتىق ءبىرىڭعاي تەستىلەۋدەن 133 بال جينادى.
«مەكتەپتە گەوگرافيا، ماتەماتيكا جانە اعىلشىن تىلىنە قاتتى كوڭىل ءبولدىم. سودان، IT سالاسىن تاڭدايمىن دەگەن جوسپارىم بولدى. دەگەنمەن 11-سىنىپتا بۇل ويىم وزگەردى. ونىما وكىنبەيمىن. قازىر بيزنەس باعىتىن تاڭداپ وتىرمىن»، - دەيدى دامير ايۋپوۆ.
تالاپكەر وقۋعا شاقىرتۋ العان ەلدەرىنىڭ اراسىندا چەحيانىڭ پراگا قالاسىن تاڭداپ وتىر. ول چەح ەلىندە ءبىلىم الۋ ءۇشىن ءبىر جىلىن ءتىل مەڭگەرۋگە جۇمسايتىنىن ايتتى.
«شەت ەلدە ءبىلىم الۋ ءۇش جىلعا جالعاسادى. تاعى ءبىر جىل سول ەلدىڭ ءتىلىن مەڭگەرەمىن. مەنى شاكىرتاقىسى 2,5 ميلليون تەڭگە بولاتىن ۋنيۆەرسيتەتتەر دە شاقىردى. ءبىراق جۇرەك قالاۋىم ەۋروپاعا ءتۇسىپ تۇر»، - دەيدى دامير ايۋپوۆ.
ايتا كەتەيىك، بۇعان دەيىن تۇركىستاندىق تۇلەك يسلام ابدۋراحمانوۆقا الەمدەگى الپاۋىت 6 مەملەكەتتە ورنالاسقان 40-تان استام جوعارى وقۋ ورنىنان شاقىرتۋ كەلگەن بولاتىن. ياعني، جاس تۇلەك ب ا ءا، ا ق ش، انگليا، پولشا، مالايزيا، شۆەيتساريا ەلدەرىندەگى الەمگە تانىمال جوعارى وقۋ ورىندارىنىڭ گرانتىن جەڭىپ الدى.
الايدا ول ا ق ش- تىڭ تەحاس شتاتىنداعى حيۋستون قالاسىندا ورنالاسقان «North American University (NAU) » وقۋ ورنىندا ءبىلىم الۋدى جوسپارلاپ وتىر.
اۆتور
قايرات زاينيشيەۆ
