تۇركىستاندىق ديقاندار ماقتانىڭ جاڭا سورتىن ءوسىرىپ جاتىر
تۇركىستان. KAZINFORM - تۇركىستان وبلىسىنىڭ اكىمى دارحان ساتىبالدىنىڭ باستاماسىمەن كورشىلەس ەلدەردىڭ ماقتا وسىرەتىن ينۆەستورلارىمەن كەلىسسوزدەر جۇرگىزىلىپ، قولايلى كەلىسىمدەر جاسالعان بولاتىن.
وسىعان بايلانىستى ماقتا-توقىما كلاستەرىمەن اينالىساتىن وزبەكستاندىق ەڭ ءىرى كومپانيالاردىڭ ءبىرى - «Global textile» كومپانياسى 2023 -جىلدان باستاپ ماقتاارال اۋدانىنىڭ نارىعىندا جۇمىس ىستەپ كەلەدى.
بيىل ەكىنشى جىل قاتارىنان ماقتاارال اۋدانى اكىمدىگىمەن بىرلەسە وتىرىپ ساپاسىنا كەپىلدىك بەرىلگەن ماقتا تۇقىمىن شارۋالارعا تاراتىپ، ول ءۇشىن زاڭ اياسىندا قاجەتتى كەلىسىم-شارتتار جاسالدى. اتالعان كومپانيا ماقتاارال اۋدانىنداعى 3 مىڭ گەكتارعا جۋىق جەرگە وزبەكستاندىق «نامانگان» تۇقىم سورتىن جەتكىزدى. ەندى كۇزگە قاراي اتالعان سورتتاردىڭ ماقتا تالشىعىن ساتىپ الۋدى جوسپارلاپ وتىر.
جۋىردا «Global textile» كومپانياسىنىڭ وكىلدەرى قۋانىشتى جاڭالىقتى ءبولىستى. ماقتاارال اۋدانىنا ماقتانىڭ «نامانگان-77» سورتى جەرسىنىپ قانا قويماي، جايقالىپ وسە باستاعان. ماقتانىڭ ءبىر بۇتاسىندا 20-دان استام جەمىس ەلەمەنتتەرى (بۇرشىكتەر، گۇلدەر) دامۋدا. ماماندار ءبارى جوسپارداعىداي بولسا، ماقتاارال اۋدانىندا ماقتانىڭ گەكتارىنان 50 سەنتنەردەن جوعارى ءونىم الىناتىنىن بولجاپ وتىر. ءبىر ايتا كەتەتىن جايت، ماقتانىڭ كولەمى عانا ەمەس، ساپاسى دا جاقسارۋدا.
«Global textile»- ماقتانىڭ شيتىنەن باستاپ ءجىپ ءيىرۋ، ماتا توقۋ، كيىم تىگۋگە دەيىنگى ارالىقتاعى كلاستەردى تولىق قامتيتىن كومپانيا. قازىرگى ۋاقىتتا كومپانيانىڭ تاشكەنت قالاسى مەن فەرعانا وبلىسىنداعى 15-كە جۋىق كاسىپورىنىندا 5 مىڭنان استام ادام جۇمىس ىستەيدى.
تۇركىستان وبلىسى اكىمدىگى مەن ينۆەستور بىرىگىپ، ماقتاارال اۋدانىندا 2 مىڭنان استام ادامدى تۇراقتى جۇمىس ورنىمەن قامتيتىن 5 ءىرى كاسىپورىندى ىسكە قوسۋدى جوسپارلاپ وتىر. ول ءۇشىن 2023-2027 -جىلدارعا ارنالعان «Global textile. Turkistan» جوباسى دايىندالعان. قۇنى 21 ميلليارد تەڭگە قۇرايتىن جوبا اياسىندا لوگيستيكا حابى، ماقتانى باستاپقى وڭدەۋ زاۋىتى، تريكوتاج ماقتا فابريكاسى، ماتا بوياۋ فابريكاسى جانە تىگىن فابريكالارى ىسكە قوسىلادى دەگەن ماقسات بار.
بۇگىندە «Global textile»كومپانياسى ماقتاارال اۋدانىندا وزدەرىنىڭ العاشقى ماقتا قابىلداۋ پۋنكتىن اشىپ جاتىر.
اۆتور
قايرات زاينيشيەۆ
