تۇركىستاندا كورەيلىك ۋنيۆەرسيتەتىنىڭ فيليالى اشىلادى
استانا. KAZINFORM - تۇركىستاندا كورەيلىك Woosong ۋنيۆەرسيتەتىنىڭ فيليالى اشىلادى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ايتتى.

«بۇگىن بىرنەشە كەلىسىمگە قول قويىلادى. ءبىرىنشىسى - سەۋل عىلىم جانە تەحنولوگيا ۇلتتىق ۋنيۆەرسيتەتى قىزىلورداداعى قورقىت اتا وڭىرلىك ۋنيۆەرسيتەتىنىڭ بازاسىندا بىرلەسكەن باعدارلاما مەن جاساندىق ينتەللەكت مەكتەبىن اشتى. ءۇش باعدارلاما ىسكە قوسىلادى: جاساندى ينتەللەكت، كومپيۋتەرلىك ينجينيرينگ جانە كيبەرقاۋىپسىزدىك. دارىستەر اعىلشىن جانە كورەي تىلدەرىندە وتەدى. ۇزدىك وقىتۋشىلار كەلەدى. بۇل جاساندى ينتەللەكت جونىندەگى ۇلتتىق جوبا اياسىندا وتە وزەكتى»، - دەدى ساياسات نۇربەك اقوردادا.
ونىڭ اتاپ وتىنشە، وتاندىق زەرتتەۋشىلەرگە «بولاشاق» جانە باسقا دا باعدارلامالار اياسىندا كورەيانىڭ ۇزدىك ۋنيۆەرسيتەتتەرى مەن زەرتحانالارىندا ءبىلىم الۋعا جانە زەرتتەۋلەرمەن اينالىسۋعا مۇمكىندىك بەرىلەدى. كورەيا ۋنيۆەرسيتەتتەرى دە قازاقستان جاستارىنا ءبىلىم گرانتتارىن ۇسىنۋعا دايىن.
«Woosong ۋنيۆەرسيتەتى كەلەسى جىلى تۇركىستان قالاسىندا كومپيۋتەرلىك ينجەنەريا، كيبەرقاۋىپسىزدىك سالالارىنا قاتىستى ۇلكەن فيليال اشادى. نەلىكتەن تۇركىستاندى تاڭدادىق؟ ويتكەنى ول حالىق سانى تەز ءوسىپ كەلە جاتقان قالا، ورتاشا جاس - 27 جاس. اتالعان ۋنيۆەرسيتەتتىڭ قازاقستانداعى فيليالىنىڭ تۇلەكتەرى تىكەلەي كوەرەياعا بارىپ جۇمىس ىستەۋگە مۇمكىندىكتەرى بولادى. جۇمىس ۆيزالارى بەرىلەدى»، - دەدى ول.
ايتا كەتەيىك، بۇگىن اقوردادا مەملەكەت باسشىسى قاسىم-جومارت توقايەۆ قازاقستانعا ۇشكۇندىك مەملەكەتتىك ساپارمەن كەلگەن وڭتۇستىك كورەيا پرەزيدەنتى يۋن سوك يەلدى قارسى الدى.
اۆتور
مارلان جيەمباي