تۇركىستاندا شەنەۋنىكتەر سيفرلاندىرۋدان اقشا جاساپ، ميلليونداعان سومادا پارا العان
تۇركىستان. KAZINFORM - تۇركىستان وبلىسى سيفرلاندىرۋ باسقارماسى باسشىسى ورىنباسارىنىڭ مىندەتىن اتقارۋشى جەمقورلىق ءۇشىن سوتتالدى.

شىمكەنت قالاسىنىڭ قىلمىستىق ىستەر جونىندەگى اۋدانارالىق سوتى تۇركىستان وبلىسى سيفرلاندىرۋ، مەملەكەتتىك قىزمەتتەر كورسەتۋ جانە مۇراعاتتار باسقارماسى باسشىسى ورىنباسارىنىڭ م. ا. م. مىرزاسەيىتوۆكە، وسى باسقارمانىڭ ءبولىم باسشىسى ا. جولسەيىتوۆكە جانە كاسىپكەر ە. يساكوۆقا ۇكىم شىعاردى.
2022 -جىلدىڭ تامىزىنان 2023 -جىلدىڭ شىلدەسىنە دەيىنگى كەزەڭدە مەملەكەتتىك ورگانداردى اقپاراتتاندىرۋ جانە سيفرلاندىرۋ جونىندەگى قىزمەتتەردى مەملەكەتتىك ساتىپ الۋ كەلىسىمشارتىن جاساسقانى، ولار بويىنشا اتقارىلعان جۇمىس اكتىسىنە قول قويۋ ءۇشىن جالپى سوماسى 14,6 ميلليون تەڭگە بولاتىن بىرنەشە رەت پارا العانى جانە بەرگەنى ءۇشىن، سونىمەن قاتار جولسەيىتوۆ بۇدان باسقا - پارا بەرۋگە جانە الاياقتىق جاساۋعا يتەرمەلەگەنى ءۇشىن كىنالى دەپ تانىلدى.
جولسەيىتوۆ تولەبي اۋدانىنىڭ سيفرلاندىرۋ ءبولىمىنىڭ باسشىسى لاۋازىمىنا اۋىسقاننان كەيىن وسىنداي ارەكەتتەردى ورىنداعانى ءۇشىن جوعارى تۇرعان لاۋازىمدى تۇلعالارعا بەرۋ سىلتاۋىمەن يساكوۆتىڭ 903 مىڭ تەڭگە سوماسىنداعى اقشالاي قاراجاتىن الاياقتىق جولمەن يەمدەنگەنى انىقتالدى.
اتالعان ۇكىممەن وتىرار اۋدانى اكىمى اپپاراتىنىڭ باسشىسى ا. ماۋلەن كونكۋرستىڭ جەڭىمپازىن انىقتاعانى جانە اۋداننىڭ اۋىلدىق وكرۋگتەرىنە IT قىزمەتتەردى مەملەكەتتىك ساتىپ الۋ كەلىسىمشارتىن جاساعانى ءۇشىن يساكوۆتان 5 ميلليون تەڭگە سوماسىندا پارا العانى ءۇشىن كىنالى دەپ تانىلدى.
سوت ۇكىمىمەن مىرزاسەيىتوۆكە 8 جىل، ىسقاقوۆقا - 7 جىل، جولسەيىتوۆكە - 4 جىل مەرزىمگە باس بوستاندىعىنان ايىرۋ جازاسى تاعايىندالدى.
سونىمەن بىرگە اتالعان ادامدار مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويى ايىرىلدى.
سوت ماۋلەننىڭ ولىمىنە بايلانىستى وعان قاتىستى قىلمىستىق قۋدالاۋدى توقتاتتى.
ۇكىم جاريالانعان كەزدە وبلىستىق سيفرلاندىرۋ باسقارماسى ۇجىمى قاتىسىپ وتىردى.
ۇكىم زاڭدى كۇشىنە ەنگەن جوق.
اۆتور
جانات قاپالبايەۆا