تۇركىستان وبلىسىندا زاماناۋي كاپسۋلالى ۇيلەر سالىنادى
تۇركىستان. KAZINFORM - تۇركىستان وبلىسىندا تۋريزم مەن تۇرعىن ءۇي ينفراقۇرىلىمىن دامىتۋعا باعىتتالعان جاڭا بىرەگەي ينۆەستيتسيالىق جوبا ىسكە اسىرىلا باستادى.
وبلىس اكىمدىگى مەن قىتاي حالىق رەسپۋبليكاسىنىڭ ءىرى وندىرىستىك كومپانيالارىنىڭ ءبىرى - «Shandong Kamoya Smart Culture and Tourism Technology Co.، Ltd.» اراسىندا ءوزارا ءتيىمدى سەرىكتەستىك ورنادى.
تۇركىستان وبلىسىنىڭ اكىمى نۇرالحان كوشەروۆ باستاعان ءوڭىر دەلەگاتسياسى ق ح ر- داعى ليني قالاسىنا ساپار جاساپ، «Shandong Kamoya» زاۋىتىنىڭ جۇمىسىمەن، وندىرىستىك قۋاتىمەن جانە يننوۆاتسيالىق شەشىمدەرىمەن تانىستى. قازىرگى ۋاقىتتا بۇل زاۋىت «KHAN TAU» برەندىمەن كاپسۋلالى ۇيلەر شىعارۋدا. ەندى وسى تەحنولوگيالار تۇركىستاندا وندىرىلەتىن بولادى.
بىلتىر جەلتوقساندا تۇركىستان وبلىسى دەلەگاتسياسىنىڭ قىتايعا جاساعان رەسمي ساپارى اياسىندا باستالعان كەلىسسوزدەر ناتيجەسىندە تاراپتار بىرلەسكەن ءوندىرىستى ۇيىمداستىرۋعا ۋاعدالاستى. 2025 -جىلدىڭ قاڭتارىندا قىتايلىق سەرىكتەستەر تۇركىستان وبلىسىنا ارنايى كەلىپ، ءوڭىردىڭ ينۆەستيتسيالىق الەۋەتىمەن تانىستى. قازىرگى تاڭدا «BNK GROUP LTD» ج ش س مەن «Shandong Kamoya Smart Culture and Tourism Technology Co.، Ltd.» اراسىندا كاپسۋلالى ۇيلەردى تۇركىستاندا جيناۋ جانە ءوندىرۋ بويىنشا كەلىسىم جاسالىپ، العاشقى ۇيلەر دايىندالدى. ولار جاقىن ارادا وڭىردەگى «KHAN TAU» دەمالىس ايماعىنا جونەلتىلەدى.
كاپسۋلالى ءۇي - بۇل جاڭا بۋىنداعى مودۋلدىك قۇرىلىس ۇلگىسى. «Shandong Kamoya» كومپانياسىنىڭ «Camoya عارىش كاپسۋلاسى» جوعارى ساناتتاعى كەمپينگتەرگە، قوناقۇيلەرگە جانە گلەمپينگكە ارنالعان زاماناۋي شەشىم رەتىندە ازىرلەنگەن. ول كەمپەر، ميني- قوناقۇي جانە مودۋلدىك ءۇيدىڭ فۋنكسيالارىن بىرىكتىرەدى. مۇنداي ۇيلەرگە جەر تەلىمىن راسىمدەۋدىڭ قاجەتى جوق، قۇرىلىس ەكولوگيالىق تازا جانە ەنەرگيا ۇنەمدەيتىن پرينتسيپتەرگە نەگىزدەلگەن. كاپسۋلا ىشكى جابدىقتارىنا كەلسەك، پانورامالىق تەرەزەلەر، جاتىن جانە تۇرعىن ايماقتار، تولىققاندى اس ءۇي مەن سانيتارلىق توراپپەن قامتىلعان. سونىمەن بىرگە «اقىلدى ءۇي» جۇيەسى، كونديتسيونەر، مۋلتيمەديا جابدىقتارى جانە تاعى باسقا جايۋدىقتارمەن جابدىقتالعان. مۇنداي عيماراتتاردى تۋريستىك كەشەندەر مەن گلەمپينگتەر، مودۋلدىك كەڭسەلەر مەن موبيلدى ۇيلەر، كورمە پاۆيلوندارى، دالا زەرتحانالارى، قوناقۇيلەرگە پايدالانۋعا بولادى. 50 جىلعا دەيىن قىزمەت ەتۋگە جارامدى.
- تۇركىستان وبلىسىندا تۋريزم مەن تۇرعىن ءۇي ينفراقۇرىلىمىن جاڭعىرتۋ باعىتىندا مۇنداي تەحنولوگيالاردىڭ ماڭىزى زور. ءبىز سىزدەرمەن ناقتى جوبالاردى بىرلەسە جۇزەگە اسىرۋعا دايىنبىز. وسى ارقىلى ءوڭىردىڭ وندىرىستىك، تۋريستىك، ينفراقۇرىلىمدىق الەۋەتىن كوتەرۋگە كۇش سالامىز، - دەدى وبلىس اكىمى نۇرالحان كوشەروۆ.
كەزدەسۋ سوڭىندا دەلەگاتسيا وكىلدەرى كومپانيا باسشىلىعىنا جىلى قابىلداۋى مەن تاجىريبە الماسۋعا مۇمكىندىك جاساعانى ءۇشىن العىس ايتتى.
شاندۇڭ - قىتايدىڭ سولتۇستىك-شىعىسىنداعى تاريحي جانە ەكونوميكالىق الەۋەتى زور ايماق. 2023 -جىلعى كورسەتكىش بويىنشا ءوڭىردىڭ جالپى وڭىرلىك ءونىمى (ج ءو ءو) 9 تريلليون يۋاننان اسىپ ($1,3 تريلليون)، ەل بويىنشا العاشقى ۇشتىككە ەندى. بۇل ءوڭىردىڭ عىلىم، ەكسپورت، ءوندىرىس، كولىك ينفراقۇرىلىمى سالالارىنداعى قارقىندى دامىعانىن كورسەتەدى.
ايتا كەتەيىك، بۇدان بۇرىن تۇركىستان وبلىسىندا 47 كوشەگە ارداگەرلەردىڭ ەسىمى بەرىلەتىندىگىن جازعان بولاتىنبىز.
اۆتور
باقىتگۇل اباي قىزى
