تۇركىستان وبلىسىندا سىرداريا وزەنىن دارىلەۋ جۇمىستارى باستالدى

تۇركىستان. KAZINFORM - شىركەيگە قارسى دەزينسەكسيا جۇمىستارى بارىسىندا وبلىس اۋماعىنداعى 352 شاقىرىمدى قۇرايتىن سىرداريا وزەنى 6 ايماققا ءبولىنىپ دارىلەنبەك.

شىركەيلەردىڭ دەرناسىلدەرىمەن كۇرەسۋ ءۇشىن دارىلەردى سۋعا جىبەرۋ ءادىسى، ال سۋ قورعاۋ جانە دالالىق ايماقتاردا حيميالىق وڭدەۋ ءادىسى قولدانىلادى. سونداي- اق، دەزينسەكسيا جۇمىستارىنىڭ وڭدەۋ الاڭى، ءدارىنىڭ كولەمى-عىلىمي سۇيەمەلدەۋدىڭ قورىتىندىسىنا سايكەس جۇرگىزىلەدى. مامانداردىڭ سوزىنە سۇيەنسەك، دارىلىك زاتتىڭ ءتورت تۇلىك مالعا، بالىق پەن وزگە تىرشىلىك يەلەرىنە ەش قاۋىپى جوق.

«بيىل 8-اقپاننان باستاپ عىلىمي سۇيەمەلدەۋ جۇمىستارى جۇرگىزىلگەن بولاتىن. اتالعان باعىتتاعى جۇمىستارعا 42 تەحنيكا مەن 96 جۇمىسشى كۇشى جۇمىلدىرىلدى. قازىرگى تاڭدا وبلىستا شىركەيلەرگە قارسى دارىلەۋ جۇمىستارىن مەردىگەر «Satti Tulik» ج ش س- ءى جۇرگىزۋدە. دەزينسەكسيا جۇمىستارىنا اۋە ۇشاعى، ارنايى كولىكتەر مەن ماماندار تارتىلعان»، - دەلىنگەن تۇركىستان وڭىرلىك كوممۋنيكاتسيا قىزمەتى تاراتقان اقپاراتتا.

ايتا كەتەيىك، بيىل تۇركىستان وبلىسىندا شىركەيمەن كۇرەس ەرتە باستالدى. وتكەن جىلى ءساۋىر ايىندا قولعا الىنعان دەزينسەكسيا جۇمىستارى بيىل ناۋرىزدان باستاپ جۇرگىزىلە باستادى.

ال، عالىم قارشىعا كوشكيمبايەۆ «كوكساراي» سۋ رەتتەگىشى تۇرعان كەزدە شىركەيدەن قۇتىلا المايمىز» - دەگەن پىكىر ايتتى.

اۆتور

اسحات رايقۇل