تۇركىستان وبلىسىندا ناۋرىز مەيرامى 10 كۇن بويى اتالىپ وتەدى
تۇركىستان. KAZINFORM - ۇلىستىڭ ۇلى كۇنىن اتاپ ءوتۋ تۇركىستاندا 14-ناۋرىزدان باستالادى. بۇل تۋرالى بريفينگتە تۇركىستان وبلىسى مادەنيەت جانە تۋريزم باسقارماسىنىڭ باسشىسى ءازىمحان قويلىبايەۆ مالىمدەدى.
14-ناۋرىز - «كورىسۋ كۇنى-امال مەرەكەسى» بارىسىندا وڭىردەگى ونەر، سپورت سالاسىنداعى قايراتكەرلەر اعا بۋىننىڭ شاڭىراقتارىنا ارنايى بارىپ، جىلدىڭ باستالۋىمەن قۇتتىقتايدى. اماندىق سۇراسىپ، كورىسەدى. سونداي-اق، وسى كۇنى «ناۋرىز - جاقسىلىقتىڭ جارشىسى» اتاۋىمەن وبلىستىق چەللەندجى ۇيىمداستىرىلادى.
15-ناۋرىز - «ناۋرىز - مەيىرىمدىلىك مەرەكەسى» رەتىندە اتالىپ وتپەك. بۇل كۇنى اۋدان-قالالاردا، اۋىلداردا جاعدايى تومەن وتباسىلارعا، مۇمكىندىگى شەكتەۋلى ازاماتتارعا كومەك كورسەتۋ ماقساتىندا قايىرىمدىلىق اكسياسى وتەدى. سونداي-اق، سوعىس، ەڭبەك ارداگەرلەرىنە، باتىر انالارعا قۇرمەت كورسەتۋ ماقساتىندا «اعا ۇرپاقتى قاستەرلەيىك» اكسياسى قولعا الىنباق.
سونىمەن قاتار، تۇركىستان قالاسىنداعى «كونگرەسس حولل» كەشەنىندە وبلىس اكىمدىگى مەن ايتىس اقىندارى جانە جىرشى-تەرمەشىلەردىڭ حالىقارالىق وداعىنىڭ ۇيىمداستىرۋىمەن تۇركىستان وبلىسى مەن جامبىل وبلىسى اقىندارى، تەرمەشى-جىرشىلارى اراسىنداعى كوماندالىق ونەر دوداسى ۇيىمداستىرىلادى.
16-ناۋرىز - «ناۋرىز - سالت-ءداستۇردىڭ جاڭعىرۋى» دەگەن باستامامەن وبلىستاعى بارلىق مادەنيەت مەكەمەلەرىندە ۇلتتىق سالت-داستۇرلەردى جاڭعىرتاتىن ساحنالىق كورىنىستەر قويىلماق.
17-ناۋرىز - «ناۋرىز - تاربيەنىڭ باستاۋى» اتاۋىمەن بارلىق مەكتەپتەردە مەرەكەلىك ءىس-شارالار، قولونەر شەبەرلەرى مەن سۋرەتشىلەردىڭ كورمەلەرى ۇيىمداستىرىلادى. سونداي-اق، جاعدايى تومەن وتباسىلاردىڭ بالالارىنا، مۇمكىندىگى شەكتەۋلى بالالارعا كومەك كورسەتىلمەك.
18-ناۋرىز - «تۇركىستان - تۇركى الەمىنىڭ تۋريستىك استاناسى» دەگەن اتپەن 09:00-دەن باستاپ تۇركىستان وبلىسىنىڭ مەملەكەتتىك قىزمەتشىلەرى ۇلتتىق كيىم كيۋ چەللەندجىن باستايدى. سونىمەن قاتار، «كەرۋەن ساراي» اۋماعىندا «تۇركىستان - تۇركى الەمىنىڭ تۋريستىك استاناسى» ءىس-شاراسىنىڭ رەسمي اشىلۋ سالتاناتى وتەدى.
19-ناۋرىز - «ناۋرىز - جاڭارۋ مەن جاڭعىرۋدىڭ، تاتۋلىقتىڭ باستاۋى» دەگەن اتپەن بارلىق وڭىرلەردە اعاش ەگۋ ءداستۇرى قولعا الىنباق. بۇل كۇنگى مەرەكەلىك ءىس-شارالار «ناۋرىز باتا» داستۇرىمەن قورىتىندىلانادى.
20-ناۋرىز - «ۇلتتىق سپورتتى ۇلىقتاۋ» كۇنىندە بارلىق وڭىرلەردەگى سپورت كەشەندەرى مەن اتشابارلاردا ۇلتتىق سپورت تۇرلەرىنەن جارىستار وتەدى.
21-ناۋرىز - «قوش كەلدىڭ - ءاز ناۋرىز!» اتاۋىمەن تۇركىستان قالاسىنداعى «كەرۋەن» سارايى اۋماعىندا وبلىس اكىمىنىڭ قاتىسۋىمەن مەرەكەلىك سالتاناتتى ءىس-شارا جوسپارلانىپ وتىر.
22-ناۋرىز - « ۇلىستىڭ ۇلى كۇنى - ءاز ناۋرىز» كۇنى تۇركىستان قالاسى مەن بارلىق اۋدان-قالالارداعى ورتالىق الاڭدار مەن ساياباقتاردا كورمەلەر، كونسەرتتىك باعدارلامالار، ۇلتتىق سپورتتىق ويىندار مەرەكە كوركىن قىزدىرادى.
23-ناۋرىز - «ناۋرىز - تازالىقتىڭ ايناسى» كۇنى وبلىس كولەمىندە جالپى حالىقتىق سەنبىلىك ۇيىمداستىرىلىپ، اۋداندار مەن قالالاردا تازالىق جۇمىستارى جۇرگىزىلەدى.
اۆتور
قايرات زاينيشيەۆ
