تۇركيادا پوليتسياعا شابۋىل جاساعان 16 ادام ۇستالدى
استانا. KAZINFORM - تۇركيانىڭ شانلىۋرفا پروۆينتسياسىندا ورنالاسقان حالفەتي قالاسىندا نارازى حالىق مۋنيتسيپاليتەت عيماراتىنىڭ ءدال الدىندا پوليتسيامەن قاقتىعىستى، دەپ حابارلايدى Kazinform مەنشىكتى ءتىلشىسى.
ماردين، باتمان جانە حالفەتي قالالارىنىڭ مەرلەرى لاڭكەستىك قۇرىلىمدارمەن بايلانىسى بار دەگەن كۇدىككە ءىلىنىپ، قىزمەتىنەن بوساتىلعاننان كەيىن جەرگىلىكتى تۇرعىندار مۋنيتسيپاليتەت عيماراتتارى ماڭىندا نارازىلىق شەرۋىنە شىقتى.
پوليتسيا عيماراتتاردىڭ جانىندا قاۋىپسىزدىك شارالارىن كۇشەيتتى، ءبىراق مۋنيتسيپاليتەتتەرگە باسقا ادامداردىڭ تاعايىندالۋى تۇرعىنداردىڭ تەرىس رەاكتسياسىن تۋدىردى.
وسىنداي تەكەتىرەس كەزىندە ءبىر توپ ادام ءتارتىپ بۇزۋشىلىقتىڭ الدىن الۋعا تىرىسقان پوليتسەيلەرگە تاس لاقتىرا باستادى. تارتىپسىزدىك سالدارىنان 16 ادام ۇستالدى. قۇقىق قورعاۋ ورگاندارى تەرگەۋ امالدارىن باستاپ، زاڭسىز ارەكەتتەرگە قاتىسقانداردى جاۋاپقا تارتاتىن بولادى.
جەرگىلىكتى بيلىك زاڭ تالاپتارىن ساقتاۋ كەرەكتىگىن ايتىپ، تۇرعىنداردى سابىرعا شاقىرسا، قۇقىق قورعاۋ ورگاندارى ايماقتاردا قاۋىپسىزدىكتى قامتاماسىز ەتۋگە ۋادە بەرىپ وتىر.
تۇركياداعى مۇناي وڭدەۋ زاۋىتىندا جارىلىس بولعانىن جازعان بولاتىنبىز.
اۆتور
زارينا تۋعانبايەۆا
