تۇركيادا سابيلەر ساۋداسىمەن اينالىسقان توپقا قاتىستى سوت ءجۇرىپ جاتىر

استانا. قازاقپارات- ىستامبۇلدا جاڭا تۋعان سابيلەردى ساتۋمەن اينالىسقان قىلمىستىق توپقا قاتىستى سوت وتىرىسىنىڭ ءتورتىنشى كۇنى اياقتالدى، دەپ حابارلايدى 24kz.

قوعامدى ءدۇر سىلكىندىرگەن سوت پروتسەسى قازىر تۇرىك قوعامىنداعى باستى تاقىرىپ. قاسكويلەر پايدا تابۋ ءۇشىن جاڭا تۋعان شاقالاقتاردى جەكە مەنشىك كلينيكاعا جىبەرىپ وتىرعان. ول جەردە بالالار وزدەرىنە مۇلدە قاجەت ەمەس، بولاشاقتا ولىمگە اكەلۋى مۇمكىن ەم قابىلداعان. جالپى 47 ادامعا قاتىستى ءىس قوزعالعان. ونىڭ 22- ءسى قاماۋدا وتىر. ايىپتالۋشىلاردىڭ ىشىندە دارىگەرلەر، مەدبيكەلەر، مەديتسينالىق مەكەمە قىزمەتكەرلەرى جانە ءبىرقاتار جەكە اۋرۋحانا وكىلدەرى بار.

ايىپتالۋشىلار كەز كەلگەن زاڭسىز ارەكەتتى تەرىسكە شىعارىپ، وزدەرىنىڭ دۇرىس شەشىم قابىلداعانىن العا تارتادى. وتكەن ايدا بەلگىلى بولعان ءىس قوعامدا ۇلكەن نارازىلىق تۋدىرىپ، دەنساۋلىق ساقتاۋ جۇيەسىنە باقىلاۋدى كۇشەيتۋگە سەبەپ بولدى. وسىدان كەيىن بيلىك 19 اۋرۋحانانىڭ 9-ىن جابۋ تۋرالى شەشىم قابىلدادى. ەلدىڭ باستى وپپوزيتسيالىق پارتياسى جاعدايعا بايلانىستى دەنساۋلىق ساقتاۋ ءمينيسترىنىڭ وتستاۆكاعا كەتۋىن تالاپ ەتتى.

كەمال مەميشوعلۋ، تۇركيانىڭ دەنساۋلىق ساقتاۋ ءمينيسترى:

- كەشىرىم سۇرايمىن، ءبىراق... قىلمىستى اشىپ، ونى قاداعالاپ، نارەستەلەرىمىزدىڭ ءولىمىنىڭ الدىن العان ءبىر ادامنىڭ قىزمەتتەن كەتۋىن تالاپ ەتەدى؟ ولاردى ۇستاعانىمىز ءۇشىن بە؟ وسىعان نازار اۋدارىلسا دەيمىن.