تۇركيادا حالىقتىڭ 30 پايىزى سەمىزدىككە شالدىققان
استانا. قازاقپارات - تۇركيا سەمىزدىككە شالدىققان جاندار سانى بويىنشا الەمدەگى العاشقى وندىققا كىرەدى. بۇل - دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى.
وسى ەلدىڭ گاستروەنتەرولوگيا قوعامىنىڭ پرەزيدەنتى دوكتور مەحمەت جيندوركتىڭ ايتۋىنشا، بۇگىندە انادولى حالقىنىڭ %30-ى ارتىق سالماقتان زارداپ شەگەدى. تۇركيادا سەمىزدىكتىڭ الدىن الۋ جانە ونىمەن كۇرەسۋ ءۇشىن ءبىرقاتار باعدارلامالار قابىلدانعان.
سالاۋاتتى ءومىر سالتىن قالىپتاستىرۋ ءۇشىن ارنايى وقۋ ورتالىقتارى دا قۇرىلعان. ماماندار ارتىق سالماقپەن كۇرەسۋدىڭ باستى العىشارتتارى - دۇرىس تاماقتانۋ مەن فيزيكالىق بەلسەندىلىك جانە تەلەديداردى كوپ كورۋ، كومپيۋتەرلىك ويىندار ويناۋ سياقتى ادەتتەردى ازايتۋ ەكەنىنە نازار اۋدارادى.
مەحمەت جيندورۋك، تۇركيا گاستروەنتەرولوگيا قوعامىنىڭ پرەزيدەنتى:
- سەمىزدىك - تەك سالماق ماسەلەسى ەمەس، بۇل - دەرت. الەمنىڭ بارلىق دامىعان جانە دامۋشى ەلدەرىندە دە وتە وتكىر تۇرعان تۇيتكىل. تۇركيا سەمىزدىككە شالدىققان جاندار سانى بويىنشا ا ق ش- پەن بىردەي دەڭگەيدە دەسە بولادى. بۇل اۋرۋدىڭ قاۋپىن كورسەتەتىن كارتا بويىنشا ءبىزدىڭ ەل ا ق ش- پەن بىردەي قىزىل تۇسپەن بەلگىلەنگەن. مالىمەتكە جۇگىنسەك، ءبىزدىڭ قوعامىمىزدىڭ 30 پايىزى سەمىزدىكپەن اۋىرادى.
