تۇركيا سيرياداعى كۇردتەرگە قارسى اسكەري وپەراتسيا دايىنداۋى مۇمكىن
استانا. KAZINFORM - سيريادا باشار اساد رەجيمى قۇلاعان سوڭ تۇركيا وسى ەلمەن شەكاراداعى اسكەرىن كوبەيتىپ جاتىر. ۆاشينگتون «يسلام مەملەكەتى» تەررور توبىمەن كۇرەسۋدى كوزدەگەن ا ق ش وداقتاسى - سيرياداعى كۇردتەر جاساعى باقىلايتىن اۋماققا تۇرىك اسكەرى باسىپ كىرە مە دەپ الاڭداپ وتىر.
بۇل تۋرالى دەرەككوزدەرىنە سۇيەنگەن The Wall Street Journal گازەتى جازدى. جوعارى لاۋازىمدى امەريكالىق شەنەۋنىكتەردىڭ ايتۋىنشا، تۇرىك ارنايى كۇشتەرى بولىمشەلەرى، تۇركيا قولدايتىن سيريا قارۋلى قۇرىلىمدارى، ارتيللەريانىڭ باسىم بولىگى كوباني قالاسى (اين- ءال- اراب) ماڭىندا شوعىرلانىپ جاتىر. سيريانىڭ سولتۇستىگىندەگى بۇل قالانى قازىر كۇرد كۇشتەرى باقىلاپ وتىر. WSJ سويلەسكەن امەريكالىق شەنەۋنىكتەردىڭ ءبىرى تۇركيا وعان باسىپ كىرۋى مۇمكىن دەپ سانايدى، ءبىراق ونىڭ اۋقىمى ازىرگە بەلگىسىز.
تۇركيا 2019 -جىلى سيريادا ازامات سوعىسى بولىپ جاتقاندا وسى ەلدىڭ سولتۇستىگى مەن سولتۇستىك- شىعىسىنداعى كۇرد كۇشتەرىنە قارسى وپەراتسيا جۇرگىزگەن. سول ۋاقىتتا شەكارا ماڭايىنداعى ءبىرقاتار اۋدان تۇرىكشىل قۇرىلىمداردىڭ باقىلاۋىنا وتكەن. الايدا تۇركيا مەن ونىڭ قولداۋىنا يە سيرياداعى وپپوزيتسيا كۇشتەرى رەسەيمەن جاسالعان كەلىسىمگە سايكەس، كەيبىر اۋدانعا، سونىڭ ىشىندە كوبانيگە شابۋىل جاساۋدان باس تارتتى.
باشار اساد رەجيمى قۇلاعان سوڭ سيريانىڭ باتىس بولىگى تۇگەل دەرلىك قارۋلى وپپوزيتسيا باقىلاۋىنا ءوتتى. ەفرات وزەنىنىڭ ارعى جاعىنداعى شىعىس پەن سولتۇستىك- شىعىستاعى اۋماق كۇرد جاساعى باسىمدىققا يە سيريا دەموكراتيالىق كۇشتەرى باقىلاۋىندا قالدى. تۇركيا سيرياداعى قارۋلى كۇردتەر جاساعىن تەررورلىق ءىس-قيمىلعا قاتىسى بار دەپ سانايدى.
سيريادا امەريكالىق اسكەر توبى بار، ولار كۇردتەرمەن بايلانىسادى. WSJ مالىمەتىنشە، سيريا دەموكراتيالىق كۇشتەرى ازاماتتىق اكىمشىلىگىنىڭ وكىلى يلحام احمەد ا ق ش- تىڭ جاڭا سايلانعان پرەزيدەنتى دونالد ترامپقا حات جازىپ، ودان تۇركيا پرەزيدەنتى رەجەپ ەردوعاندى اسكەري وپەراتسيادان باس تارتۋعا كوندىرۋىن وتىنگەن.
«ازاتتىق» سايتى
